مویس سوءقصدچیلری اؤلدورولدو

هائیتی پرزیدنتی جوونیل مویسه سوءقصد ائد‌نلره قارشی آپاریلان عملیات‌دا ۴ نفر اؤلدو، ۲ نفر گؤزآلتینا آلیندی.

هائیتی گوونلیک گوجلری، مویسی اؤلدوره‌ن سالدیرقانلاری توتماق اوچون عملیات باشلاتدی.

مسئوللار، پلیس طرفین‌دن یئرلرینی معین ائتدیگی شبهه‌لیلره قارشی عملیاتیندا ۴ سلاحلی شخصین وورولدوغونو و ۲ نفرین گؤزآلتینا آلیندیغینی آچیقلادی.

هائیتی باشباخانی کلود ژوزف، سالدیرقانلارین خاریجی موزدورلار اولدوقلارینی و اینگیلیزجه و اسپانیولجا دانیشدیقلارینی سؤیله‌دی. دیگر طرف‌دن، سوروشدورمایا گؤره، سالدیری سیراسین‌دا پرزیدنت مویسه ۱۲ مرمی اصابت ائتدیگی بیلگیسی پایلاشیلدی.

هائیتی‌نین ۵۳ یاش‌لی پرزیدنتی مویس، بیر قروپ سلاحلی شخص طرفین‌دن ائوینه ائدیله‌ن سالدیریدا اؤلدو و حیات یولداشی مارتین مویس یارالاندی.

گئچیجی باشباخان کلاود ژوزف، مویسین ائوین‌ده اؤلدورولمه‌سین‌دن سونرا اؤلکه‌ده فؤوق‌ا‌لعاده وضعیت اعلان ائتدی.

دیگر طرف‌دن، پرزیدنت رجب طیب اردوغانین حیات یولداشی امینه اردوغان، سوسیال مئدیا حسابین‌دان مویس اوچون باش‌ساغلیغی مئساژی پایلاشدی.

خاریجی ایشلر باخانلیغی دا مویسنین اؤلدورولمه‌سینی کسکین شکیل‌ده قینادی و خاریجی ایشلر باخانی مؤولود چاووش‌اوغلو، مویس اوچون باش‌ساغلیغی مئساژی پایلاشدی.

بیرلشمیش میللتلر تشکیلاتینین گوونلیک شوراسی دا مویس سالدیریسینی قینادی.