میانمار-دا هلاک اولانلارین سایی 753 نفره چاتیب
میانمار-دا اعتراض آکسیالاریندا حیاتینی ایتیرنلرین سایی 753 نفره چاتیب.
میانمار-دا حربی چئوریلیش و سئچیلمیش حکومت عضولرینین حبس ائدیلمهسینه قارشی تشکیل ائدیلن اعتراض آکسیالاریندا تهلوکهسیزلیک قوهلرینین سلاحلی موداخیلهسی نتیجهسینده حیاتینی ایتیرنلرین سایی 753 نفره یوکسلیب.
میانمار سیاسی محبوسلارا یاردیم تشکیلاتی طرفیندن یاییملانان گوندهلیک راپوردا سون 24 ساعات عرضینده داها 2 نفرین اؤلدوگو بیلدیریلیب. راپوردا عمومی جان ایتکیسینین 753 نفره یوکسلدیگی، داها 3 مین 441 نفرین ده ساخلانیلدیغی قئید اولونوب.
دیگر طرفدن کارن میللی بیرلیگی آدلی ائتنیک قروپلاشما اؤلکهنین گونئی ینده میانمار اوردوسونا عایید بیر حربی مرکزی نظارتینه کئچیریب.
بو بارده کارن میللی بیرلیگینین مطبوعات خیدمتیندن وئریلن معلوماتدا بیلدیریلیب. معلوماتا گؤره، یئرلی واختلا ساعات 04.30-دا کارن ایالتینین موتراو بؤلگه سینده یئرلشن حربی مرکزه باسقین تشکیل ائدیلیب. قارشیدورمالار نتیجه سینده کارن میللی بیرلیگینین حربی مرکزی نظارتینه کئچیردیگی بیلدیریلیب. قارشیدورما زامانی نئچه نفرین هلاک اولدوغو ایله باغلی معلومات وئریلمهییب.