جان کربی:"امریکا عسگرلرینین عراق گئری چکیلمه‌سی‌نین واختی بللی دئییل"

پنتاگون امریکا عسگرلرینین عراق-دان چیخاریلما تقویمینه دایر راضیلیغین اولمادیغینی بیلدیردی.

امریکانین ساوونما ناظیرلیگی‌نین (پنتاگون) سؤزچوسو جان کربی عراق-داکی امریکا عسگرلرینین گئری چکیلمه  تقویمینه دایر راضیلیغین اولمادیغینی سؤیله‌ییب.

امریکانین خاریجی ایشلر ناظیری آنتونی بلینکن ایله عراق-ین خاریجی ایشلر ناظیری فواد حسین‌ین رهبرلیگی آلتیندا ایکی اؤلکه‌نین نوماینده هئیت‌لری‌نین قاتیلدیغی دیالوگ دانیشیق‌لارینین اوچونجو تورونون نتیجه‌سینده وئریلمیش اورتاق آچیقلاما موباحیثه لره سبب اولدو.

گونده‌لیک مطبوعات کنفرانسیندا سوال‌لاری جاوابلاندیران کربی اورتاق آچیقلامادا یئر آلان "امریکا عسگرلرینین عراق-دان گئری چکیلمه پروسه‌سی‌نین داوام ائتمه‌سی باره‌ده راضی‌لیق الده ائدیلدی" ایفاده‌سی‌نین اصلینده عسگرلرین اؤلکه‌دن چیخماغا باشلایاجاغی معناسینی داشیمادیغینی ایره‌لی سوروب.

کربی "بیاناتدا بیلدیریلیر کی، ایکی طرفین عسگرلرین عراق-دان سون چیخما قراریندا بعضی علاوه تکنیکی دانیشیق‌لارین آپاریلماسینا قرار وئریلدی" دئییب.

امریکانین عراق-دا باغداد رهبرلیگی‌نین تصدیق و دعوتی ایله عراق-دا اولدوغونو ایفاده ائدن کربی ترور تشکیلاتی داعش-ا قارشی باشلاتیلان میسیونون عراق-دا دایمی بیر امریکا حربی مؤوجودلوغونا اساسلانمادیغینی و رهبرلیگین اوزون مدت‌دیر عراق-دان بیر گون آمریکا‌لی عسگرلرین چیخاجاغینی دانیشدیغینی سؤیله‌ییب.

ایکی طرفین ده امریکانین اؤلکه‌ده‌کی مؤوجودلوغونون اهمیتی باره‌ده راضیلیغا گلدیک‌لرینی ادعا ائدن کربی "آچیقلامادا گؤردوک‌لرینیز ده اصلینده عراق ایله طرفداشلیغیمیزین داعش-ا قارشی داوام ائدن وظیفه میزین اهمیتینه و نتیجه‌ده دوزگون گئری چکیلمه اوچون اویغون واخت حاقیندا دانیشماق ایسته‌یه‌جگیمیزه دایر بیر وورغودور" ایفاده‌سیندن ایستیفاده ائدیب.