افریقا بیرلیگی و بمت-دن سومالی-یه اورتاق چاغیری

افریقا بیرلیگی کمیسیونونون صدری موسی فاکی محمد و بمت-نین باش کاتیبی آنتونیو گوترش سئچکی‌لر واختیندا کئچیریلمه‌دیگی اوچون گرگینلیگین آرتدیغی سوما‌لی-ده طرف‌لری "دیالوقا" چاغیریب‌لار.

افریقا بیرلیگی و بمت-نین بیرگه بیاناتیندا سون ایللرده اؤلکه‌نین ثابت‌لیگی ایستیقامتینده الده اولونان ایرلیلییشه گؤره سوما‌لی خالقی و لیدرلری تعریف‌لنه‌رک، بو قازانج‌لارین سوما‌لی خالقی‌نین دایمی باریشی الده ائتمه عزمی‌نین ثبوتو اولدوغو ایفاده ائدیلیب.

بیاناتدا اؤلکه‌ده 17 سپتامبر 2020-جی ایلده کئچیریلن سئچکی‌لرله باغلی الده اولونان راضیلاشمایا حؤرمتله یاناشیلماسی ایسته‌نیلیب و بیلدیریلیب کی، کمیسیون صدری و باش کاتیب سوما‌لی لیدرلرینی دیالوقا داوام ائتمه‌یه و سئچکی‌لره اولان سیاسی انگل‌لری ان قیسا مدتده آرا‌دان قالدیرماق اوچون راضی‌لیق ایچینده ایشلمه‌یه چاغیریرلار.

سوما‌لی-ده موخالیفت جمهور باشقانی نامیزدلری جمهور باشقانی محمد عبدالله فرماجونون صلاحیت مدتی 8 فوریه‌ده بیتمه‌سینه باخمایا‌راق وظیفه‌‌سینده قالماسینا اعتراض اولا‌راق خالقی کوچه‌لره چاغیرمیشدی.