امریکا فیلیستینه یاردیم‌لاری برپا ائدیر

امریکا-دا وظیفه‌سی‌نین ایجراسینا یئنی باشلایان جو بایدن رهبرلیگی سابیق پرزیدنت دونالد ترامپ دؤورونده دایاندیریلمیش فیلیسطینه یاردیم‌لاری برپا ائدجگینی و ایکی دؤولت‌لی حل یولو اوچون سعی گؤسترجگینی بیلدیریب.

بمت تهلوکه‌سیزلیک شوراسیندا چیخیش ائدن امریکانین بمت-ده‌کی دایمی نماینده‌سی‌نین معاوینی ریچیرد میللس بایدن رهبرلیگی‌نین اول‌لر دایاندیریلمیش فیلیسطینه یاردیم‌لاری یئنی‌دن آکتیولشدیرجگینی سؤیله‌ییب.

ترامپ دؤورونده امریکا-دا باغلانمیش فیلیسطین-ین دیپلوماتیک نماینده‌لیک‌لری‌نین یئنی‌دن آچیلاجاغینی بیلدیرن میللس بمت-نین فیلیسطین‌لی‌لره یاردیم پروقرام‌لاری‌نین برپا ائدیله‌جگینی وورغولاییب.

"یئنی رهبرلیگین اورتا دوغو سیاستی، ایچینده ایسراییل-ین تهلوکه‌سیز و باریش ایچینده یاشایاجاغی و یانیندا اؤز آیاق‌لاری اوزرینده دایانان بیر فیلیسطین دؤولتی‌نین اولدوغو، باره‌سینده راضی‌لیق الده اولونموش ایکی دؤولت‌لی بیر حل یولو دستکله‌مک‌دیر" دئیه میللس قئید ائدیب.

فیلیسطین قورتولوش تشکیلاتی ایسه واشنگتن-دا باغلانمیش دیپلوماتیک نومایندلیگین یئنی‌دن آچیلماسی قرارینی ممنونیتله قارشیلاییب.

تشکیلاتین ایجرا هئیتی عضوو احمد مجدلانی "امریکانین بو آدیمی مثبت و گؤزل‌دیر. بو آدیم یئنی رهبرلیگین اوولکی رهبرلیگین (دونالد ترامپ رهبرلیگی) سهو‌لرینی دوزلتمه‌سینده‌کی جدی‌لیگینی عکس ائتدیریر" دئییب.