جو بایدن آند ایچه‌رک وظیفه‌سینه باشلادی

آمریکانین یئنی سئچیلمیش پرزیدنتی جو بایدن  و ایلک قادین باشقان یاردیمچیسیی کاملا هریس وظیفه‌لرینه باشلادیلار. 
بایدن و هریس آندایچمه مراسیمین‌دن اؤنجه واشینگتن‌داکی حواری متیو کلیسه‌سینی زیارت ائتدی و داها سونرا کنگره بیناسینا گئتدی. 
جو بایدن و کاملا هریس تورکیه واختی ایله ساعات ۲۰.۰۰دا آند ایچه‌رک وظیفه‌لرینین ایجراسینا باشلادیلار.
آمریکانین یئنی سئچیلمیش پرزیدنتی جو بایدن آند ایچدیک‌دن سونرا دانیشماسیندا، "بو گون دموکراسینین، تاریخین و اومودون گونودور. بوتون آمریکالی‌لارین باشقانی اولاجاغام و دونیا ایله بیر داها یاخین ایلیشکی‌لر قوراجاغیق" دئدی. 
کاملا هریس آمریکانین ایلک قادین باشقان یاردیمچیسی‌دیر.