آمریکا میانمارداکی حادثهلری "اتنیک تمیزلمه" آدلاندیردی
آمریکانین خاریجی ایشلر ناظیری رکس تیلرسون میانماردا آوقوست آییندان بو یانا 600 میندن چوخ آراکان مسلمانینین بنگلادش-ه قاچماسینا سبب اولان زوراکیلیق دالغاسینی "اتنیک تمیزلمه" اولاراق آدلاندیردی.
آمریکانین خاریجی ایشلر ناظیری رکس تیلرسون میانماردا آوقوست آییندان بو یانا 600 میندن چوخ آراکان مسلمانینین بنگلادش-ه قاچماسینا سبب اولان زوراکیلیق دالغاسینی "اتنیک تمیزلمه" اولاراق آدلاندیردی.
تیلرسون آراکان مسلمانلارینین دؤزولمهیهجک درجهده آغری-آجی چکدیکلرینی، بو وضعیته گؤره میانمار تهلوکهسیزلیک قوهلرینین و یئرلی بودیست میلیسلرین مسئولیت داشیدیقلارینی سؤیلهدی.
تیلرسون میانمار اردوسونون زوراکیلیق دالغاسینین باشلاماسینا گؤره مسئولیتی آراکان روهینگیا قورتولوش اوردوسونون اوزرینه آتماسینی دا تنقید ائدهرک:" بو دهشتلی ظلم هئچ بیر پروواکاسیونلا حاقلی گؤستریله بیلمز"دئدی.
تیلرسون دلیل لرین دقتلی و اطرافلی آنالیزیندن سونرا بونون اتنیک تمیزلمه اولدوغونون معین ائدیلدیگینی، آمریکانین "هدف گوزلهین تحریم " ده داخیل اولماقلا، قانونی یوللا عدالتی تامین ائتمهیه چالیشاجاغینی قئید ائتدی.
قئید ائدک کی، آمریکا خاریجی ایشلر ناظیری کئچن هفته میانمارا گئدهرک، اؤلکهنین حاضیرکی لیدری آونگ سان سوو کیی و آراکان عملیاتلارینا رهبرلیک ائدن باش قرارگاه رئیسی مین آونگ هلاینگ ایله گؤروشموشدو.
سپتامبر آییندا بیرلشمیش میللتلر تشکیلاتی دا آراکاندا تؤرهدیلن وحشیلیگی "ائتنیک تمیزلمه" آدلاندیرمیشدی.
بؤلگهده اردونون وحشیلیک درجهسینه چاتان هوجوملاریندا مینلرله مسلمان اؤلدورولوب. میانمار رهبرلیگینین اؤلکهیه گیریش-چیخیشلارا ایجازه وئرممهسی سببیندن اؤلن سیویل لرین سایی تام شکیلده معین اولونا بیلینمیر.