"تورنادولارین اینجیرلیک‌دن چئکیلمه‌سی یالنیز بیزی ایلگیلندیریر"
زیگمار گابریل: تورکیه آوروپا‌لی بیر قونشو اولدوغو اوچون آنکارا ایله دیالوگون و امکداشلیغین داوام ائتمه‌سی لازیم
آلمانیا خاریجی ایشلر باخانی زیگمار گابریل، آلمان تورنادولاری‌نین آدانا‌داکی اینجیرلیک هاوا مرکزین‌دن چئکیلمه‌سی‌نین، یالنیز اؤزلرینی ماراقلان‌دیران بیر مسئله اولدوغونو سؤیله‌دی.
زیگمار گابریل، اؤلکه‌سی‌نین بو مرکزی، اولوسلارآراسی کوالیسیونون تروریزمه قارشی یئریتدیگی مباریزه‌نی دستکلدیگی اوچون ایستیفاده ائتدیگینی بیلدیردی.
گابریل آلمانیا آ.ر.د تلویزیون کانالیندا یایینلانان تاگستیمن آدلی پروگرامدا؛
'آلمانیا اؤز چیخار‌لاری اوچون بورادا' دئدی.
آلمان عسگرلری‌نین تورکیه‌ده ائدیلن خالق اویلاماسی سببیله اینجیرلیک هاوا مرکزین‌دن چئکیلمه‌سی‌نین دوشونجه‌سیزلیک اولاجاغینی و آلمانیانین بونونلا اؤزونه ضرر وئرجیینی ایفاده ائدن خاریجی ایشلر باخانی، تورکیه ایله امکداش‌لیق‌دان واز گئچیلمه‌سی اوچون هر هانسی بیر سبب گؤرمه‌دیگینی، تام ترسینه، تورکیه آوروپا‌لی بیر قونشو اولدوغو اوچون آنکارا ایله دیالوگون و امکداشلیغین داوام ائتمه‌سی لازیم اولدوغونو بیلدیردی.
عکس تقدیرده تورکیه‌نین روسیایا داها یاخینلاشماسی‌نین زمینه‌سی‌نین یارادیلاجاغینی دا ادعا ائدن آلمان باخان، بو وضعیتین آلمان ماراق‌لارینا اویغون اولمادیغینی قید ائتدی.
