بیرلشمیش کرال‌لیقدا رفراندومون "خیر" قراری‌نین آردین‌دان ایشچی پارتیدن ایستعفا‌لار گلیر
کوربین، سئچیجی‌لرین اعتراضینا ده قارشیلاشیر. دونن پایتخت لندن‌ده ائدیلن بیر گئدیشه قاتیلان کوربین، اعتراض ائدیلدی و ایستعفا ائتمه‌سی ایستندی
بیرلشیک کرال‌لیقدا ائدیلن اوروپا بیرلیگی خالق اویلاماسین‌دان چیخان "خیر" قراری‌نین آردین‌دان آنا مخالیفت‌دکی ایشچی پارتیسین‌دن ایستعفا‌لار گلیر.
رفراندوم کامپانیاسی زامانی اوروپا بیرلیگی قالینماسین‌دان یانا کامپانیا آپاران آنجاق کامپانیایا کیفایت قدر دستک وئرممکله تنقید اولونان ایشچی پارتیسی‌نین عمومی باشقانی جرمی کوربین، پارتی‌نین مشهور آدلارین‌دان هیلاری بن‌ین کؤلگه کابینه‌دکی وظیفه‌سینه دونن آخشام سون وئردی.
بن ائتدیگی آچیقلامادا، "جرمین‌ین ایشچی پارتیسی لیدری اولا‌راق بیر سونراکی عمومی سئچیمی قازانابیله‌جگینه اینانیلمیر. جرمی ایله ائتدیگیم تلفون گؤروشمه‌سینده اؤزونه اعتباریمی ایتیردیگیمی سؤیلدیم، او دا منی قوودو." دئدی.
اینگیلیس سیاستینده آنا مخالیفت پارتیسی‌نین کابینه‌سی معناسینی وئرن "کؤلگه کابینه‌دکی" بیر چوخ اینسان‌ین ایستعفا ائده‌جگی مطبوعاتا عکس اولونور. هیلاری بن‌ین وظیفه‌سین‌دن آلینماسی‌نین آردین‌دان بو سحر کؤلگه ساغلیق ناظیری هیدی آلکساندر دا ایستعفا ائتدی.
کئچن ایلدن بو یانا ایشچی پارتیسی لیدرلیگی ائدن 67 یاشین‌داکی جرمی کوربین حاقیندا بعضی ایشچی پارتیلی میللت وکیل‌لری اؤلکه‌دکی "خیر" قراری‌نین آردین‌دان گوون رایی یوخلاماسی ائدیلمه‌سینی ایستمیشدی.
کوربین، سئچیجی‌لرین اعتراضینا ده قارشیلاشیر. دونن پایتخت لندن‌ده ائدیلن بیر گئدیشه قاتیلان کوربین، اعتراض ائدیلدی و ایستعفا ائتمه‌سی ایستندی. آنجاق کوربین دونن ائتدیگی آچیقلامادا، ایستعفا ائتمیه‌جگینی، وظیفه‌سی‌نین باشیندا اولدوغونو سؤیلمیشدی.
650 صندللی اینگیلیس پارلامنتینده 229 میللت وکیلی اولان ایشچی پارتیسی، اوروپا بیرلیگی رفراندوم اوّلینده بیرلیکده قالینماسین‌دان یانا کامپانیا ایجرا ائتدی. 23 ژوئن جمعه آخشامی گونو ائدیلن رفراندومدا خالقین یوزده 52سی "اوروپا بیرلیگیدن آیریلاق" دئدی.
