تورکیه‌نین نؤوبتی اویدوسو – "تورک سات 5ب" دسامبردا اوزایا گؤندریله‌جک

"تورک سات 5ب"اویدوسونون دسامبرین سونوندا اوربیته چیخاریلماسی‌نین پلانلاشدیریلدیغی آچیقلانیب.

نقلیات و آلت یاپی ناظیری عادل کارا اسماعیل اوغلو وئردیگی یازی‌لی آچیقلامادا "تورک سات 5ب" اویدوسونون  دیزاین و اوره تیم مرحله‌لری‌نین اوغورلا تاماملاندیغینی بیلدیریب.

کارا اسماعیل اوغلو "اویدونون مؤوجود لاییحه جدولینه گؤره، 2021-جی ایلین دسامبر آیی‌نین سونوندا امریکانین فلوریدا ایالتینده‌کی Cape Canaveral مرکزیندن "فالگون-9" نوع راکت ایله اوربیته بوراخیلماسی پلانلاشدیریلیر" دئییب.

گئنیش زولاق‌لی معلومات اؤتورمه قابیلیتی ایله اویدو اورتا دوغو، کؤرفز اؤلکه‌لری، قیرمیزی دنیز، آرا‌لیق دنیزی، قوزیی و دوغو افریقا، نیجریه، گونئی افریقا و قونشو اؤلکه‌لر ده داخیل اولماقلا گئنیش احاته دایره‌سینده خیدمت گؤستره‌جک.

"تورک سات 5ب"نین مانور عمرونون 35 ایلدن چوخ اولاجاغی احتیمال ائدیلیر. اویدونون ایستیفاده ائدیلمه سی ایله "تورک سات آ.ش."ا عایید ایله تیشیم اویدولارینین سایی بئشه چات‌دیریلا‌جاق.