ایرواندا کئچیریلن اعتیراض نمایشلرینده 151 نفر توتوقلانیب

ارمنیستانین پایتخاتی ایرواندا آذربایجانلا سرحدی معیین ائدن پروتوکولون حاضیرلانماسینا عکس‌العمل اولاراق کئچیریلن اعتیراض نمایشلرینده 151 نفر توتوقلانیب.

ارمنیستان داخیلی ایشلر ناظیرلیگینین مطبوعات مرکزینین نماینده‌سی بیلدیریب کی، توتوقلانان شخصلر انضباطی جرملر قانونون پولیسه مقاویمتله باغلی 182-جی ماده‌سینی پوزدوقلارینا گؤره پولیس مرکزلرینه آپاریلیبلار. همین شخصلرین لازیمی پروسه‌لردن سونرا آزادلیغا بوراخیلماسی پلانلاشدیریلیر.

بوندان اول ایرواندا کئچیریلن میتینگده ارمنی حواری کیلسا‌سینین تاووش اسقفلوغو رهبری، باش اسقف باگرات گالستانیان، باش ناظیر نیکول پاشینیانا اولتیماتوم وئره‌رک، اونون بیر ساعات عرضینده ایستعفا وئرمه‌سینی طلب ائدیب.

گالستانیان «بوندان سونرا پاشینیان حاکیمییتی اعتیبارسیزدیر» دئیه‌رک، حؤکومتی اؤلکه‌نی اداره ائتمکده «تام اوغورسوزلوق» نمایش ائتدیرمکده‌، «تهلوکه‌سیزلیک سیستمینی چؤکدورمکده‌» و «میللی کیملیگین اساسلارینا» قصد ائتمکده ایتیهام ائدیر.

اولتیماتومون مدتی بیتدیکدن سونرا گالستانیان باش ناظیرین ایستعفاسینی تامین ائتمک اوچون علاوه آددیملار آتاجاقلارینی بَیان ائدیب.

حاکیم مولکی موقاویله پارتیسی، باش اسقفون اولتیماتوملارینا جاواب اولاراق بَیاناتیندا پاشینیان اؤلکه‌نین سئچیلمیش باش ناظیری اولدوغونو خاطیرلادیب. "یاشاسین دموکراتیک و مستقل ارمنیستان جمهورتی"، بَیاناتی وئریب.

آوریلین 22-ده آذربایجان-ارمنیستان سرحدینین معیینلشدیریلمه‌سی پروسه‌سینه استارت وئریلیب. بو باغلامدا ارمنیستان 1990-جی ایللره قدر آرتیق آذربایجان شوروی جمهوریتینه مخصوص اولان قازاخ ولایتینین 4 کندینی آذربایجانا وئریب.

راضیلاشدیریلمیش سرحد خطی ایله باغلی پروتوکولون می آیینین 15-دک ایمضالانماسی پلانلاشدیریلیر.

ارمنیستانین باش ناظیری نیکول پاشینیان بیلدیریب کی، آذربایجانلا راضیلاشمایا اویغون اولاراق قوشونلار سرحدین معیین ائدیلمیش حیصّه‌لرینه یئرلشدیریله‌جک.