میرزویان: بایراموولا ائدیلن گؤروشمه مثبت هاوادا گئچدی
"اؤزللیکله ایلک مرحلهده آذربایجان ایله دمیریولو باغلانتیسینین یئنیدن قورولماسییلا ماراقلانیریق"
ارمنیستان خاریجی ایشلر باخانی آرارات میرزویان، ایش گؤروشمهلری اوچون باشکند ایروانا گئدن آوروپا گوونلیک و امکداشلیق تشکیلاتی (آگیت) دؤنم باشقانی و مالتا خاریجی ایشلر، آوروپا ایشلری و تیجارت باخانی ایان بورگلا گؤروشدو.
ارمنیستانین رسمی خبر آژانسی آرمنپرسین خبرینه گؤره میرزویان، آذربایجانلا یئریدیلن باریش آنلاشماسی گؤروشمهلرینه توخوناراق خاریجی ایشلر باخانی جئیحون بایراموولا قازاقیستانین آلمانی شهرینده گئرچکلشن گؤروشمهنین مثبت هاوادا گئچدیگینی سؤیلهدی.
میرزویان، هر ایکی اؤلکهنین تورپاق بوتونلوگونون قارشیلیقلی تانینماسینین و سرحد تعیین ائتمه ایشلرینین، ۱۹۹۱ آلماتی بیلدیرگهسی تملینده داوام ائتدیریلمهسینین لازیم اولدوغونو قید ائتدی.
باخان میرزویان، سؤزو گئدن بیلدیرگه اساسلارینین آذربایجان ایله اوزرینده دانیشیلان باریش آنلاشماسینا داخیل ائدیلمهسینین، اوزون مدتدیر داوام ائدن بؤلگهسل آنلاشمازلیغین سونا چاتدیریلماسینی و گونئی قافقازدا قالیجی بیر باریشین قورولماسینی ممکن ائدجگینه ایناندیغینی قید ائتدی.
باریشین اؤنملی بیر بؤلومونون ده بؤلگهدهکی نقلیات یوللارینین یئنیدن آچیلماسی اولدوغونو وورغولایان میرزویان،
"اؤزللیکله ایلک مرحلهده آذربایجان ایله دمیریولو باغلانتیسینین یئنیدن قورولماسییلا ماراقلانیریق، البته بوتون آلتیاپیلار گئچدیگی اؤلکهلرین اگمنلیگی آلتیندا اولاجاق، او اؤلکهلرین یارغی صلاحیتینه گؤره ایشلهیهجک و البته دۆزنلهمهلر، قارشیلیقلیلیق و برابرلیک پرنسیپلرینه اویغون اولاجاق" ایفادهسینی ایشلتدی.