ایسرائیلین ایرانا قارشی عکس هوجوم تشکیل ائتدیگی آچیقلانیب
ایران رسمیلری "اؤلکهیه هئچ بیر راکئت هوجومو اولمادیغینی، لاکین بیر سیرا پیلوتسوز اوچوش آپاراتی وورولدوغونو" بیان ائدیب
ایسرائیلین ایرانا قارشی جاواب هوجومو تشکیل ائتدیگی آچیقلانیب.
آمریکا مطبوعاتینین آدی آچیقلانمایان مسئوللارا ایستینادن وئردیگی معلوماتا گؤره، ایسرائیل بو گون سحر تئزدن ایرانا قارشی عکس هوجوم کئچیریب.
ABC نیوز قید ائدیب کی، ایسرائیلین عینی زاماندا سوریه و عراقدا بعضی بؤلگهلری ووردوغونا دایر ایدعالار تصدیق ائدیلمییب.
CNN-ه دانیشان آمریکا رسمیسی قید ائدیب کی، ایسرائیل هوجومدان اول "ایرانا قارشی محدود عکس هوجوم کئچیرهجیینی" بیان ائدیب و آمریکا بو هوجومو "دستکلهمهییب".
بو قایناق علاوه ائدیب کی، هوجوم زامانی وورولان اراضی اتم تاسیساتی دئییل.
آمریکا خاریجی ایشلر ناظیرلیگی و پنتاگون سؤزوگئدن هوجومو هلهلیک رسما تصدیقلهمهییب.
ایران مدیاسی دا ایران حربی هاوا قووهلری تاسیساتینین یئرلشدیگی اصفهان ویلایتینین قوزئی دوغوسوندا پارتلاییش سسلرینین ائشیدیلدیگینی آچیقلاییب.
دؤولت تلویزیونو خبرینده "خبر منبعلری اصفهان ایالتینده نیسبتا گوجلو پارتلاییشین ائشیدیلدیگینی بیلدیریر. بو سسین قایناغینین نه اولدوغو هله آچیقلانماییب"، بیلدیریب.
یاری رسمی فارس خبر آژانسی دا یئرلی منبعلره ایستینادن خبر وئریب کی، اصفهانین قوزئی دوغوسونداکی قهجاورستان شهرینده پارتلاییش سسی ائشیدیلیب.
ایرانین دؤلت خبر آژانسی هاوا هوجوموندان مودافیعه سیستملرینین بیر چوخ ایالتده آتش آچدیغینی آچیقلاییب.
ایران رسمیلری "اؤلکهیه هئچ بیر راکئت هوجومو اولمادیغینی، لاکین بیر سیرا پیلوتسوز اوچوش آپاراتی وورولدوغونو" بیان ائدیب.
یاری رسمی مهر خبر آژانسی یئرلی واختلا ساعات 04:00 جواریندا اصفهان 8-جی اساس جت تاسیساتی اطرافیندا 3 مینی پیلوتسوز اوچوش آپاراتینین آلچاق هوندورلوکده هاوا هوجوموندان مودافیعه سیستملری طرفیندن ضررسیزلشدیریلدیگینی بیلدیریب.
استراتژی اهمیتلی بیر یئرده یئرلشن اصفهاندا حربی تاسیسات یانیندا همچنین حربی تحقیقات و اینکیشاف ساحهلری و بیر چوخ موهوم حربی بؤلگه وار.
یاخینلیقداکی نطنز شهری ایرانین اتم زنگینلشدیرمه تاسیسلریندن بیرینه ائو صاحیبلیگی ائدیر.
ایرانین رسمی تلویزیونو اصفهانداکی هئچ بیر اتم تاسیسینین تاثیرلنمدیگینی و اتم تاسیسلرینین هدف آلینمادیغینی آچیقلاییب.
ایسرائیلین رسمی رادیوسو بیلدیریر کی، ایسرائیل ایرانا قارشی هوجومون مسئولییتینی هله اؤز اوزرینه گؤتورمهییب.
ایسرائیل آوریلین 1-ده ایرانین دمشقدهکی سفیرلیگی بؤلگهسیندهکی کونسوللوق بیناسینا هاوا هوجومو هیاتا کئچیریب، نتیجهده ایکیسی ژنرال اولماقلا ایران انقلاب کئشیکچیلری اوردوسو عضوو 7 نفر هلاک اولوب.
تهران اؤتن هفته ایسرائیله جاواب وئردی و 300-دن چوخ مهمات دولو پیلوتسوز اوچوش آپاراتی و راکتله ایسرائیله قارشی هیاتا کئچیریلن عملیاتیندا بیر نفر یارالانیب.