ایراندان نۆوه دکترینی آچیقلاماسی
"اگر ایسرائیل، ایرانا باسقی ائتمک اوچون نۆوه مرکزلریمیزه هوجوم تهدیدیندن بیر آراج اولاراق ایستیفاده ائتسه، ایران نۆوه دوکترین و سیاستینی گؤزدن گئچیره‌بیلر"
ایران اینقیلاب گؤزتچیلری اوردوسو سپاه نۆوه مرکزلری قوروما بیرلیکلری باشچیسی ژنرال احمد حق‌طلب، ایسرائیلین اؤلکه‌سینی نۆوه تاسیسلرینه سالدیرماقلا تهدید ائتمه‌سی دوروموندا، "نۆوه دکترینین" دییشدیره‌بیله‌جکلرینی سؤیله‌دی.
تسنیم خبر آژانسینا گؤره، حق‌طلب، ایسرائیلین ایرانا اولاسی سالدیری سناریولارینی دگرلندیردی.
حق‌طلب، "اگر ایسرائیل، ایرانا باسقی ائتمک اوچون نۆوه مرکزلریمیزه هوجوم تهدیدیندن بیر آراج اولاراق ایستیفاده ائتسه، ایران نۆوه دوکترین و سیاستینی گؤزدن گئچیره‌بیلر و اؤنجه‌کی اعلان ائدیلمیش ملاحظه‌لرینی دییشدیره‌بیلر" دئدی.
ایرانین ساوونما سیستملرینین سالدیریلارا قارشی قویماغا حاضر اولدوغونو دیله گتیره‌ن حق‌طلب، ایسرائیلین سالدیرما‌سی دوروموندا ایسرائیلده‌کی نۆوه تاسیسلرین مختصاتینا صاحب اولدوقلارینی و موشکلرله وورماق اوچون حاضر اولدوقلارینی ایفاده ائتدی.
ایرانلی باشچی، اؤلکه‌سینین "نۆوه دوکترینی" قونوسوندا آچیقلاما وئرمه‌دی.
باتیلی اؤلکه‌لر ایرانین نۆوه فعالیتلرینین، نۆوه سلاحی اۆرتمه پتانسیلی داشیدیغینی ادعا ائد‌رک تحریملر تطبیق ائدیر.
اؤلکه‌نین دینی لیدئری علی هخامنه‌اینین ۱۲ دسامبر ۲۰۱۰.جو ایلده نۆوه سلاح یاپیمینی "حرام" اعلان ائدن فتواسی، اؤلکه‌نین نۆوه دوکترینی اولاراق قبول ائدیلیر.
ایران خاریجی ایشلر باخانی حسین امیرعبداللهیان، بیرلشمیش میللتلر باش کاتیبی آنتونیو گوترشله ۷ جولای ۲۰۲۲ده ائتدیگی گؤروشمه‌ده، "ایرانین دوکترینینده نۆوه سلاحلارینین یئری یوخدور. سیاست و اینانجلاریمیزا ضددیر" ایفاده‌لرینی ایشلتمیشدی.
ایسرائیل، ایرانین دمشقده‌کی کونسوللوق بیناسینا ۱ آوریلده هاوا سالدیریسی تشکیل ائتمیش، ایران اینقیلاب گؤزتچیلری اوردوسوندان ۲سی ژنرال روتبه‌سینده ۷ نفر اؤلموشدو.
ایران، ایسرائیلین کونسوللوق سالدیریسینن اؤلکه‌سینین تورپاقلارینا سالدیری معناسینی وئردیگینی و قارشیلیق وئره‌جکلرینی بیلدیرمیشدی.
ایسرائیل ده ایرانین سالدیریلارینا جاواب وئرجگینی بیلدیرمیشدی.
ایران سیراغا گئجه ایسرائیله یوزلرله کامی‌کازه اینسانسیز هاوا آراجی، بالیستیک و کروز موشکی ایله سالدیری باشلاتمیش، بعضی عسگری هدفلرین وورولدوغونو آچیقلامیشدی.
ایسرائیل ایسه سالدیریلارین چوخونون هاوا ساوونما سیستملری طرفیندن اؤنلندیگینی آنجاق گونئیده‌کی بیر عسگری مرکزه موشک اصابت ائتدیگینی ایفاده ائتمیشدی.
