خامنهای: ایسرائیلی پئشمان ائدهجییک
"خبیث رژیم، ساواشچیلاریمیزین الی ایله جزالاندیریلاجاق. اللهین اذنی ایله اونلاری بو و بنزری سوچلاری تۆرهتدیکلرینه پئشمان ائدجییک"
ایرانین دینی لیدئری علی خامنهای، سوریهنین باشکندی دمشقدهکی ایران دیپلوماتیک نمایندهلیگینه هوجوم ائدن "ایسرائیل رژیمینی پئشمان ائدجکلرینی" سؤیلهدی.
ایرانین دمشقدهکی ائلچیلیک یئرلشکهسینده اولان کونسوللوق بیناسینا تشکیل ائدیلهن هاوا سالدیرسینا باغلی سالدیریدا حیاتینی ایتیرهنلرین ایتکیسینین آجیسینین ایران میللتی اوچون آغیر اولدوغونو ایفاده ائدن خامنهای،
"خبیث رژیم، ساواشچیلاریمیزین الی ایله جزالاندیریلاجاق. اللهین اذنی ایله اونلاری بو و بنزری سوچلاری تۆرهتدیکلرینه پئشمان ائدجییک" ایفادهلرینی ایستیفاده ائتدی.
ایران جمهورباشقانی ابراهیم رئیسی ده، اؤلکهسینین دمشقدهکی کونسوللوق بیناسینا "ایسرائیل طرفیندن تشکیل ائدیلهن هوجومون جاوابسیز قالمایاجاغینی" سؤیلهدی.
جمهورباشقانی رئیسی، یازیلی آچیقلاماسیندا، ایسرائیلین ایران کونسوللوغونا تشکیل ائتدیگی موشک سالدیریسینی ترور سوچو و اولوسلارآراسی حقوقون آغیر پوزونتوسو اولاراق تانیملایاراق،
"صهیونیست رژیم، مقاومت جبههسی ساواشچیلارینین اینانج و ایرادهسی قارشیسیندا آلدیغی مغلوبیتلر و باشاریسیزلیقلاردان سونرا اؤزونو قورتارما موباریزهسینده کور سوءقصدلری گۆندمینه آلماغا باشلادی" ایفادهلرینی ایشلتدی.
تل آویو رهبرلیگینین بو جور حرکتلرله مقصدلرینه چاتابیلمهیهجگینی ایفاده ائدن ابراهیم رئیسی،
"مقاومت جبههسینین هر گئچهن گون گۆجلندیگینه و اؤزگور اولوسلارین بونلارین مشروع اولمایان طبیعتینه قارشی دویدوقلاری انزجار و نیفرته شاهد اولوروق. بو قورخاقجا جنایت قارشیلیقسیز قالمایاجاق" دگرلهندیرمهسینی وئردی.
ایران اینقیلاب گؤزتچیلری اوردوسوندان دونن وئریلهن آچیقلامادا، ایرانین دمشق ائلچلیگی یئرلشکهسیندهکی کونسوللوق بیناسینا ایسرائیل طرفیندن تشکیل ائدیلهن موشک هوجوموندا ژنرال محمدرضا زاهدی ایله ژنرال محمد هادی حاجی رحیمی داخیل ۷ مسئولونون حیاتینی ایتیردیگی بیلدیریلمیشدی.
سوریهده سون آیلاردا دفعهلرله ایرانا عاید هدفلره هاوا هوجوملاری تشکیل ائدن ایسرائیل ایسه هوجومون مسئولیتینی رسمی اولاراق بوینونا گؤتورمهدی.