پاکیستان، تهران ائلچیسینی گئری چاغیردی

پاکیستان، ایرانین سالدیریسیندان سونرا تهران ائلچیسینی گئری چاغیردی.

پاکیستان خاریجی ایشلر باخانلیغی سؤزچوسو ممتاز زهرا بلوچ، اسلام آباددا وئردیگی آچیقلامادا، ایرانین سببسیز یئره پاکیستانین اگمنلیگینی پوزماسینین آردیندان تهران ائلچیسینی گئری چاغیردیقلارینی و بۆتون اۆست سویه سفرلرین لغو ائدیلدیگینی بیلدیردی.

بلوچ، بو یاسادیشی حرکتین قبول ائدیلمز اولدوغونا و هئچ بیر حاقلی سببی اولمادیغینا ایشاره ائد‌رک،

"پاکیستان بو یاسادیشی حرکته قارشیلیق وئرمه حاقینی ساخلی توتور. اورتایا چیخاجاق نتیجه‌لرین مسئولیتی بیرباشا ایرانا عاید اولاجاق" دئیه دانیشدی.

بو مئساژین ایران حکومتینه چاتدیریلدیغینی دیله گتیره‌ن بلوچ،

"پاکیستانین، تهران ائلچیسینی گئری چاغیرما قراری آلدیغینی و بو آندا ایراندا اولان ایرانین اسل آماباد ائلچیسینین ده بیر مدت گئری قاییدابیلمه‌یه‌جگینی اؤزلرینه بیلدیردیک" دئدی.

بلوچ، گله‌جک گۆلرده پاکیستان و ایران آراسیندا داوام ائد‌ن یا دا پلانلانان بۆتون اۆست سویه سفرلرین آسقییا آلیندیغینی قید ائتدی.

پاکیستان خاریجی ایشلر باخانلیغیندان دۆنن وئریلن آچیقلامادا، اؤلکه‌نین هاوا ساحه‌سینین ایران طرفیندن سببسیز یئره پوزولماسی شدتله قیناناراق، سالدیریدا ۲ اوشاغین حیاتینی ایتیردیگی، ۳ قیز اوشاغینین یارالاندیغی ایفاده ائدیلمیشدی.

آچیقلامادا، پاکیستانین اگمنلیگینین بو شکیلده پوزولماسینین قبول ائدیلمز اولدوغو و جدی نتیجه‌لر دوغورابیله‌جگی ایفاده ائدیلمیشدی.