ایران و روسیا دو‌لاری کنارا قویدولار

ایران و روسیا تیجارت عملیات‌لاریندا امریکا دو‌لاری اوزینه میللی پول‌دان ایستیفاده ائتمک باره‌ده راضیلیغا گلدی‌لر.

ایرانین رسمی آژانسی ایرنا-نین ایران مرکزی بانکینا ایستینا‌دن وئردیگی خبره گؤره، ایکی اؤلکه‌نین مرکزی بانک صدرلری آراسیندا روسیادا کئچیریلن گؤروشده دو‌لارین قارشی‌لیق‌لی تیجارت‌دن چیخاریلماسینا دایر راضیلاشما الده اولونوب.

بیلدیریلیب کی، امریکا تحریم لری آلتیندا اولان ایران و روسیا بانک‌لاری آرتیق یئرلی پول لار ایله عملیات‌لار آپارماق اوچون SWIFT-دن باشقا، بانکلاراراسی سیستم‌لردن ده ایستیفاده ائده بیلرلر.

خاطیرلاداق کی، ایران و روسیا 2022-جی ایلین جولای آییندا قارشی‌لیق‌لی تیجارت عملیات‌لاریندا امریکا دو‌لاری یئرینه اؤز میللی پول لاریندان ایستیفاده ائتمگی پلانلاشدیردیق‌لارینی آچیقلامیشدی‌لار. ایران دینی رهبری آیت الله علی خامنه ای همین ایلین 17 جولای یندا تهراندا روسیا پرزیدنتی ولادیمیر پوتین ایله گؤروشونده دو‌لاردان قلوبال تیجارتده ایمتینا ائدیلمه‌لی اولدوغونو بیان ائده‌رک "دو‌لار تدریجن قلوبال تیجارت یولون‌دان چیخما‌لی‌دیر" دئییب. ولادیمیر پوتین ده امریکانین دو‌لاری تضییق واسیطه‌سی کیمی ایستیفاده ائتمه‌یه چالیشدیغینی قئید ائده‌رک ایران و روسیانین تیجارت علاقه‌لرینده اؤز میللی پول لاریندان ایستیفاده‌نین یول‌لاری‌نین حاضیرلاندیغینی بیلدیریب.

قئید ائدک کی، ایران 2023-جو ایل دسامبرین 25-ده روسیانین باشچی‌لیق ائتدیگی آوراسیا اقتصادی بیرلیگی ایله آزاد تیجارت سازیشی ایمضالاییب.