رئیسی: ایسرائیل و آمریکا محاکیمه اولونمالی
ابراهیم رئیسی، بریکس عضولرینه و حکومتلره، میللتچیلیگه قارشی موباریزه ائتمک اوچون بوتون سیاسی و اقتصادی گوجلریندن ایستیفاده ائدرک ایسرائیله و اونون باتیلی دستکچیلرینه باسقی ائتمهلری چاغریسی ائتدی
ایران جمهورباشقانی ابراهیم رئیسی، ایسرائیلین غزهده شیمیایی سلاح ایستیفادهسینی آراشدیرماق اوچون اؤزل بیر اولوسلارآراسی هیئت اولوشدورولماسی تکلیفی ائتدی.
ایران رسمی آژانسی ایرنایا گؤره رئیسی، گونئی آفریقانین دعوتی اۆزرینه غزهدهکی وضعیته باغلی بریکس (برزیل، روسیا، هیندیستان، چین و گونئی آفریقا) لیدئرلری و بریکس عضولوگونه دعوت ائدیلهن اؤلکه لیدئرلرینین قاتیلدیغی فؤوقالعاده آنلاین ذیروهده دانیشدی.
غزهنی باتینین اخلاقی چؤکوشونون سمبولو اولاراق تانیملایان رئیسی، "بو گون، بوتون دونیا غزهده فیلیسطین خالقینا قارشی ایشلهنهن بنزری گؤرولمهمیش خشونت و سوچا جانلی اولاراق شاهیدلیک ائدرکهن بیر آرایا گلدیک. بو گونلرده غزهده یاشانانلار باتیلی اولوسلارآراسی سیستمین عدالتسیزلیگینی آچیقجا اورتایا قویور. غزه مسئلهسی اینسانلیق و عدالت مسئلهسیدیر" دئدی.
ابراهیم رئیسی، بریکس عضولرینه و حکومتلره، دونیادا گوونلیگی و عدالتی تامین ائتمک و میللتچیلیگه قارشی موباریزه ائتمک اوچون بوتون سیاسی و اقتصادی گوجلریندن ایستیفاده ائدرک ایسرائیله و اونون باتیلی دستکچیلرینه باسقی ائتمهلری چاغریسی ائتدی.
رئیسی، ایسرائیله سلاح و عسگری مهمات گؤندرهن آمریکا بیرلشمیش دؤولتلری، اینگیلتره، آلمانیا و فرانسانین آتیشکسین تامین ائدیلمهسینه مانع تؤرتدیکلرینی، آمریکانین غزهیه گئدن کؤمک یوللارینی تیخادیغی کیمی بیرلشمیش میللتلر گوونلیک شوراسینی دا فلج ائتدیگینی سؤیلهدی.
ایسرائیللی مسئوللارین "اوشاقلاری قانونی هدف" اولاراق معین ائتمهسینی و "غزهیه نووه سالدیری سئچهنگینی" دیله گتیرمهسینی تنقید ائدن ایران لیدئری، "هر جور شیمیایی کوتلوی قیرغین سلاحی و اتم بومباسییلا دونانمیش بیر رژیم، کسینلیکله بؤلگهسل و اولوسلارآراسی باریش و گوونلیگه قارشی بیر تهدیددیر" دئدی.
بعضی اؤلکهلرین، ایسرائیلین غزهدهکی سوچلارینی اولوسلارآراسی جزا محکمهسینه داشیما حرکتینی دستکلدیکلرینی دئین رئیسی، ایسرائیلین یانیندا آمریکانین دا "اینسانلیغا قارشی سوچلار و اوشاقلاری اؤلدورمه سوچلاریندان" اولوسلارآراسی محکمهلرده محاکیمه اولونماسی لازیم اولدوغونو ایفاده ائتدی.
رئیسی، قاداغالی سلاحلارین ایستیفاده ائدیلمهسینی آراشدیرماق اوزره ده اؤزل بیر اولوسلارآراسی هیئت قورولماسی تکلیفی ائتدی.