امیرعبداللهیان، سیارتو ایله دانیشدی
ایران ایله ماجاریستان آراسینداکی ایلیشکیلرین آرتدیغینا توخونان امیرعبداللهیان، موشاویره‌لرین داوام ائتدیریلمه‌سینین ایکی اؤلکه آراسینداکی ایلیشکیلرین گلیشیمی باخیمیندان مثبت اولدوغونو ایفاده ائتدی
ایران خاریجی ایشلر باخانی حسین امیرعبداللهیان ایله ماجار قونومداشی پیتر سیارتو، ایکی اؤلکه آراسینداکی ایلیشکیلرین یانیندا فیلیسطینده‌کی سون وضعیتی دانیشدی.
ایران خاریجی ایشلر باخانلیغینین اکس سوسیال مئدیا پلتفورموندان ائدیلن پایلاشیمدا، امیرعبداللهیان ایله ماجاریستان خاریجی ایشلر و خاریجی تیجارت باخانی سیارتونون تلفوندا دانیشدیغی ایفاده ائدیلدی.
تلفن دانیشماسیندا، سالدیریلار سببی ایله غزه‌ده‌کی اینسانی وضعیتین پیسلشدیگینی ایفاده ائد‌ن امیرعبداللهیان، ایسرائیلین، غزه‌ده‌کی اینسانلاری، بومبالایاراق و توپلوجا قتل ائد‌رک بوتون اینسان حاقلارینی و اولوسلارآراسی حقوقو آچیقجا پوزدوغونو ایفاده ائتدی.
امیرعبداللهیان، ایسرائیلین غزه‌یه قارشی عسگری سالدیریلارینین همن دوردورولماسی، عاجیل و شرط‌سیز آتیش‌کس تامین ائدیلمه‌سی و غزه خالقینا اینسانی کؤمک گؤندریلمه‌سی ایمکانینین ساغلانماسی اوچون اولوسلارآراسی توپلومون باسقی ائتمه‌سی لازیم اولدوغونو وورغولادی.
ایران ایله ماجاریستان آراسینداکی ایلیشکیلرین آرتدیغینا توخونان امیرعبداللهیان، موشاویره‌لرین داوام ائتدیریلمه‌سینین ایکی اؤلکه آراسینداکی ایلیشکیلرین گلیشیمی باخیمیندان مثبت اولدوغونو ایفاده ائتدی.
ماجاریستان خاریجی ایشلر باخانی سیارتو دا ایران و ماجاریستان آراسینداکی ایلیشکیلرین گلیشمه‌سینین هر یؤنو ایله داوام ائتدیریله‌جگینی و تشویق ائدیله‌جگینی اومود ائتدیگینی ایفاده ائتدی.
سیارتو، اؤلکه‌سینین فیلیسطینده‌کی گۆنجل گلیشمه‌لره باغلی توتومونو دا دیله گتیردی.
