ایران‌دا ان آز ۲۶۰ نفر گؤزآلتینا آلیندی

ایران‌دا مهسا امینی‌نین اؤلومونون بیرینجی ایل دؤنومونده گوونلیک گوجلری، اولاسی گؤستریلری اؤنله‌مه سببی ایله ۲۶۰دان چوخ شخصی گؤزآلتینا آلدی.
اصلاحاتچیلارا یاخینلیغییلا بیلینه‌ن شرق قزئتی، امینی‌نین اؤلوم ایل دؤنومو اولان ۱۶ سپتامبر گونو مختلیف شهرلرده چوخ ساییدا وطنداشین گؤزآلتینا آلیندیغینی یازدی.
رسمی قایناقلارا دایاندیریلان بیلگییه گؤره، ۱۶ سپتامبردا اؤلکه‌ده ۲۶۰دان چوخ شخص گوونلیک گوجلری طرفیندن گؤزآلتینا آلیندی.
ان چوخ گؤزآلتی باتی آذربایجان ایالتینده گئرچکلشدی. باتی آذربایجان پلیس اداره‌سی ۱۳۷ نفرین گؤزآلتینا آلیندیغینی بیلدیردی.
اصفهان ایالتینده ۹۷ نفر، کوردوستان ایالتینده ایسه ۱۶ نفر گؤزآلتینا آلیندی.
آیری آیری شهرلرده ده ۱۰ نفر گؤزآلتینا آلینارکه‌ن باشکند تهران و سیستان و بلوچیستان ایالتینده نئچه نفرین گؤزآلتینا آلیندیغینا دایر آچیقلاما وئریلمه‌دی.
ایرانین باشکندی تهران‌دا ۱۳ سپتامبر ۲۰۲۲ده "اخلاق پلیسی" اولاراق بیلینه‌ن ارشاد گزن تیملری طرفیندن گؤزآلتینا آلیندیقدان سونرا پیسله‌شیب خسته‌خانایا قالدیریلان ۲۲ یاشینداکی مهسا امینی ۱۶ سپتامبردا حیاتینی ایتیرمیشدی.
امینی‌نین اؤلومو اوزرینه شهری ساقیزدا ۱۷ سپتامبر ۲۰۲۲ده باشلایان گؤستریلر، اؤلکه‌یه یاییلاراق یؤنه‌تیم قارشیدی اعتراضلارا چئوریلمیشدی.
آیلارلا سوره‌ن حادثه‌لرده تخمیناً ۵۰۰ گؤستریچی اؤلدورولموش، یوزدن چوخ گوونلیک گؤره‌و‌لیسی ده حیاتینی ایتیرمیشدی.
ایران، گؤستریلرده گؤزآلتینا آلینانلار حاقیندا رسمی بیر آچیقلاما وئرمزکه‌ن، موستقیل قایناقلار گؤستریچیلردن مینلرجه اینسانین گؤزآلتینا آلیندیغینی ادعا ائدیردی.