آمریکالی ژنراللار ایرواندا

ارمنیستان‌دا آمریکا بیرلشمیش دؤولتلری ایله اورتاق ائدیله‌ن مانورا نظارت ائتمک آماجی ایله ژنرال گرگوری آندرسون و ژنرال پاتریک الیس‌ین ارمنیستانین باشکندی ایروانا گئتدیگی آچیقلاندی.
ارمنیستان‌داکی آمریکا ائلچیلیگیندن وئریله‌ن یازیلی آچیقلامادا، ایروانا گلن آمریکا ۱۰.جو داغ تومن کوموتانی ژنرال گرگوری آندرسون ایله آمریکا آوروپا و آفریقا قورو گوجلری قرارگاه باشقانی کؤمکچیسی، عملیات باشقانی ژنرال پاتریک الیس‌ین، آمریکانین ارمنیستان ائلچیسی کریستینا کوین ایله داوام ائد‌ن "ایگل پارتنر ۲۰۲۳" مانورونا نظارت ائد‌جکلری بیلدیریلدی.
ائلچی کوین بو قونویلا باغلی،
"ایگل پارتنر ۲۰۲۳ مانورو، ارمنیستانلا اوزون مدتدیر داوام ائد‌ن اورتاقلیغیمیزین بیر دلیلیدیر و ارمنیستانین، آمریکا ساوونما باخانلیغی دؤولت اورتاقلیق پروگرامی چرچیوه‌سینده کانزاس اولوسال گؤزتچیلری ایله قالیجی ایلیشکیسی ایله دستکله‌نیله‌ن اونلارجا ایللیک باشاریلی باریشی قوروما و گوونلیک امکداشلیغینا دایانماقدا‌دیر" آچیقلاماسینی وئردی.
ژنرال آندرسون دا،
"ارمنیستانلا باغلاریمیز چوخ طرفلی امکداشلیغا دایانماقدادیر. آمریکا، اؤزللیکله نووه سلاحلارینین یاییلامسینین اؤنله‌نمه‌سی و باریشین قورونماسی کیمی حساس ساحه‌لرده اؤلکه قابیلیتلرینین گوجلندیریلمه‌سی آماجی ایله داواملی اولاراق ارمنیستانا عسگری کؤمک‌ ائتمکده‌دیر" ایفاده‌لرینی ایشلتدی.
آچیقلامادا آیریجا مانورون عینی زامان‌دا ارمنیستان ۱۲.جی باریشی قوروما توغایینی ایل سونوندا ائدیله‌جک ناتو/باریش اوچون اورتاقلیق "عملیات قابیلیتلری آنلاییشی" دگرلندیرمه‌سینه حاضرلاماق آماجینی داشیدیغی قید ائدیلدی.
ارمنیستان ساوونما باخانلیغی، ارمنیستان ایله آمریکانین، ۱۱-۲۰ سپتامبردا اورتاق "ایگل پارتنر ۲۰۲۳" مانورو گئرچکلشدیریله‌جگینی آچیقلامیشدی.
مانورا ارمنیستاندان ۱۷۵، آمریکا‌دان ۸۵ عسگرین قاتیلاجاغی ایفاده ائدیلمیشدی.