زلنسکی بلینکن ایله گؤروشوب و اوکراینایا یاردیمی موذاکیره ائدیب
امریکانین خاریجی ایشلر ناظیری اوکراینانین پایتاختی کیئوه سفری چرچیوه‌سینده پرزیدنت ولودیمیر زلنسکی ایله گؤروشوب.
امریکانین خاریجی ایشلر ناظیری آنتونی بلینکن اوکراینایا سفری زامانی بو اؤلکه‌یه 1 میلیارد دو‌لارلیق یئنی یاردیم پاکتینی آچیقلاییب.
بلینکن "سوپریز شکیلده" گئتدیگی اوکراینادا بو اؤلکه‌نین پرزیدنتی ولودیمیر زلنسکی، باش ناظیر دنیس شمیگال و خاریجی ایشلر ناظیری دیمیترو کولبا ایله گؤروشوب.
زلنسکی و دنیس شمیگال ایله گؤروش‌لریندن اول مطبوعاتا آچیقلاما وئرن بلینکن امریکانین اوکراینایا دستکینی داوام ائتدیرجگینی وورغولاییب.
بلینکن اوکراینا‌لی همکاری کولبا ایله گؤروشون‌دن سونرا بیرگه مطبوعات کنفرانسی کئچیریب.
زلنسکی‌نین جبهه‌ده‌کی تجروبه‌لرینی دینله‌دیگینی بیلدیرن بلینکن "اوکراینانین روسیایا قارشی هوجوموندا سون هفته‌لرده رئال ایرلیلییش وار" دئییب.
بلینکن امریکانین اوکراینایا یئنی 1 میلیارد دو‌لارلیق یاردیم پاکتینی آچیقلایارکن، "سون هفته‌لرده داوام ائدن عکس-هوجوم سرعت قازاندی. اوکراینایا وئرجییمیز یئنی یاردیملا بو سرعت داها دا آرتا‌جاق" دئیه وورغولاییب.
همین یاردیم پاکتی چرچیوه‌سینده اوکراینایا 175 میلیون دو‌لارلیق ساوونما یاردیمی وئریله‌جک. بو یاردیما یوکسک پرفورمانس‌لی توپچو راکت سیستمی (هیمارس) راکت‌لری، جاولین زره‌لی راکت سیستم‌لری، تانک علیهینه سیستم‌لر و آبرامز تانک‌لاری اوچون اورانیوم تانک مهمات لاری داخیل‌دیر.
پاکتین 300 میلیون دو‌لارینا روسیا‌دان گؤتورولن بولگه لرده نظمین یارادیلماسی اوچون حقوق-محافظه اورقان‌لاری‌نین دستکی داخیل‌دیر.
پاکتین 100 میلیون دو‌لاری "خاریجی حربی مالیلشدیرمه"، 206 میلیون دو‌لاری ایسه اینسانی یاردیم اولا‌راق وئریله‌جک. قالان حیسه ایسه اوکراینانین اوزونموددت‌لی احتیاج‌لاری اوچون آیریلا‌جاق.
