سوئدین بغدادداکی ائلچیلیک بیناسی یاندیریلدی

عراقین باشکندی بغداددا، شیعه دینی و سیاسی لیدئر مقتدی الصدرین لیدئری اولدوغو صدر حرکتینه باغلی قروپلار، سوئد ائلچیلیگی بیناسینا گیره‌رک بعضی بؤلوملری یاندیردی.
صدر حرکتی یانداشلاری، ائلچیلیک یاخینلارینا گئده‌رک سوئد‌ده‌کی قرآنا قارشی ائیلملره اعتراض ائتمه‌یه باشلادی.
گؤستریچیلر، ائلچیلیک اطرافینا قورولان بتون انگللری ییخیب، سوئد حکومتینه قارشی شعار وئررک، ائلچیلیک باغچاسینا گیردی.
اعتراضچیلار، سوئد ائلچیلیگی بیناسینین بعضی بؤلوملرینی یاندیردی.
عراق خاریجی ایشلر باخانلیغیندان وئریلن آچیقلامادا، سوئدین بغداد ائلچیلیگی بیناسینین یاندیریلماسینین شدتله قیناندیغی ایفاده ائدیله‌رک،
"بو حرکت، دیپلوماتیک نماینده‌لیکلره سالدیری و گوونلیگی تهدید ائتمه چرچیوه‌سینه گیریر" ایفاده‌سینه یئر وئریلدی.
آچیقلامادا، حکومت طرفین‌دن، سوئد ائلچیلیگینه قارشی حرکتی گئرچکلشدیرنلرین تاپیلیب قانونلارا گؤره جزالاندیریلماسی و حادثه‌نین پرده آرخاسینین آیدینلاتیلماسی اوچون گوونلیک گوجلرینه سوروشدورما باشلاتما تاپشیریغی وئریلدیگی ده بیلدیریلدی.
صدرچیلر داها اؤنجه ده سوئد ائلچیلیگی بیناسینی باساراق ائیلم تشکیل ائتمیشدی.