آنا مالیار: "اوکراینا اوردوسو دوغودا هم هوجوم، هم ده ساوونما عملیات‌لارینی داوام ائتدیریر"

اوکراینا ساوونما ناظیری‌نین معاوینی آنا مالیار دوغودا روسیانین ایشغالیندان آزاد ائدیلن اراضی‌لرین سون بیر هفته‌ده 9 کیلومتر مربع، گونئی‌ده ایسه 28،4 کیلومتر مربع آرتدیغینی بیلدیریب.

مالیار سوسیال مئدیا حسابیندان وئردیگی آچیقلامادا، سون بیر هفته‌ده دوغو و گونئی جبهه‌لرینده باش وئرن‌لری دگرلندیریب.

مالیار بیان ائدیب کی، اوکراینا اوردوسو دوغودا هم هوجوم، هم ده ساوونما عملیات‌لارینی داوام ائتدیریر:

"باخموت ایستیقامتینده ایرلیلییریک. دوشمن لیمان، آودییوکا و مارینکا ایستیقامت‌لرینده هوجوم‌لارینی داوام ائتدیریر".

مالیار قئید ائدیب کی، روس‌لار بو ایستیقامت‌لرده اوکراینا قوشون‌لارینی موضع لریندن قووماغا چالیشسا‌لار دا، جاواب‌لارینی آلیب‌لار.

بو ایستیقامت‌لرده شدت‌لی توققوشما‌لارین داوام ائتدیگینه دقت چکن مالیار "سون بیر هفته‌ده عملیات شرایطی‌نین یاخشیلاشدیریلماسی و جبهه خطی‌نین هامارلانماسی نتیجه‌سینده آزاد ائدیلن اراضی 9 کیلومتر مربع آرتیب" دئییب.

روسیا قوه‌لری‌نین سون بیر هفته‌ده دوغوسونداکی هوجوم‌لارینی ایکی قات آرتیردیغینی بیل‌دیرن مالیار کئچن هفته 6 مین 457 هوجومون قئیده آلیندیغینی، بو رقمین ایسه کئچن هفته 11 مین 753 اولدوغونو ایفاده ائدیب.

اوکراینانین گونئی ینده‌کی ساوونما قوه‌لری‌نین ملیتوپل و بردیانسک ایستیقامت‌لرینده هوجوم عملیات‌لارینی داوام ائتدیردیگینی وورغولایان مالیار سون بیر هفته‌ده جنوب جبهه‌سینده آزاد ائدیلن اراضی‌لرین 28،4 کیلومتر مربع آرتدیغینی قئید ائدیب.

بو آرادا اوکراینا اوردوسو روسیا حربی قوه‌لری ایله شدت‌لی توققوشما‌لارین یاشاندیغی دونتسک بؤلگه‌سینده موختلیف ایستیقامت‌لردن هوجوم‌لارینی داوام ائتدیریر.

قئید ائدک کی، اوکراینا سلاحلی قوه‌لری‌نین 72-جی مکانیزه تیپی‌نین توپچو بؤلمه‌لری بولگه‌ده‌کی ووگلدار ایستیقامتینده حربی فعالیتینی داوام ائتدیریر.

گون عرضینده اونلارلا آتش آچان عسگرلر جبهه خطینده دؤیوشن اوکراینا قوشون‌لاری‌نین ایره‌لیلمه‌سینه و یئنی یاشاییش منطقه‌لری‌نین اله کئچیریلمه‌سینه دستک وئریر.