روسیا: اوکراینانی 700 مین اوشاق روسیادا‌دیر

روسیا پارلامئنتی‌نین یوخاری قانادی اولان فدراسیون شوراسی‌نین اولوسلار آراسی علاقه‌لر کومیته‌سی‌نین صدری گریگوری کاراسین اوکراینا-‌داکی موناقیشه زونالاریندان‌ اولان 700 مین اوشاغین روسیادا اولدوغونو بیلدیریب.

کاراسین سوسیال مئدیا حسابیندا کیئو رهبرلیگی‌نین اوشاق‌لارلا باغلی "پروبلئم یاراتماغا" جهد گؤستردیگینی ایره‌لی سوروب.

کاراسین دئییب کی، روسیا بعضی آوروپا اؤلکه‌لریندن فرق‌لی اولا‌راق اوشاق‌لارا قایغی و ایستی موناسیبت بسلییر. سون ایللرده اوکراینا‌داکی موناقیشه زونالاریندان‌ قاچان 700 مین اوشاق اؤلکه‌میزه سیغینیب. چوخ‌لاری عائله‌لری ایله، اوشاق ائوینده‌کی اوشاق‌لار ایسه معلم‌لری ایله.

قئید ائدک کی، اوکراینا روسیا قوه‌لرینی لوگانسک و دونتسک ویلایت‌لریندن اوکراینا‌لی اوشاق‌لاری قاچیرماقدا اتهام ائدیر.

اوشاق‌لاری تاپماق و خلاص ائتمک مقصدیله یارادیلان اوکراینانین موقتی ایشغال اولونموش اراضی‌لری‌نین اینتگراسیونو ناظیرلیگی‌نین پورتا‌لی‌نین معلوماتینا گؤره، محاربه‌نین باشلادیغی 24 فوریه 2022-جی ایل تاریخیندن ایندییه‌دک 19 مین 492 اوکراینا‌لی اوشاق قانون‌سوز اولا‌راق دیپورت ائدیلیب.

اوکراینا پرزیدنتی ولودیمیر زلنسکی بیلدیریب کی، روسیایا قانون‌سوز آپاریلان اوکراینا‌لی اوشاق‌لارین سایی 19 میندن چوخ اولا بیلر، چونکی روسیانین نظارتینده اولان اوکراینا اراضی‌سینده ان آزی 200 مین اوشاق وار.

اولوسلار آراسی جینایت محکمه‌سی روسیا-اوکراینا محاربه‌سی زامانی اوکراینا‌لی اوشاق‌لارین روسیایا قاچیریلماسی ایله باغلی روسیا پرزیدنتی ولادیمیر پوتین و روسیانین اوشاق حقوق‌لاری کمیساری ماریا لوووا-بئلووانین حبسینه امر وئریلدیگینی آچیقلاییب.

آچیقلامادا هر ایکی شوبهه‌لی‌نین اوکراینا‌لی اوشاق‌لارین قانون‌سوز یول‌لارلا روسیایا آپاریلماسی جینایتینده ایشتیراک ائتدیگی و پوتین‌ین نظارتینده اولان شخص‌لرین بو جینایتی تؤرتمه‌سینه مانع اولمادیغینا گؤره مسئولیت داشیدیغی بیلدیریلیب.