ایران: اتم انرژیسی آژانسینین راپورو دوغرو دئییل
"آژانسین یئنی مفتیشلریندن بیری، ایرانین شهید علی محمدی (فردو) اورانیوم زنگینلشدیرمه تاسیسینده‌کی چالیشما پروسه‌سینده اعلان ائدیلمه‌میش بیر دییشیکلیک ائدیلدیگینی یانلیشلیقلا راپور ائتمیش"
ایران، اولوسلارآراسی اتم انرژیسی آژانسی طرفیندن سونولان "فردو بؤلگه‌سینده‌کی اورانیوم زنگینلشدیرمه تاسیسینده بیلدیریلمه‌میش بیر دییشیکلیک ائدیلدیگی" ایله باغلی راپورون دوغرو اولمادیغینی ساووندو.
ایرانین یاری رسمی مهر خبر آژانسینین معلوماتینا گؤره، باشکند تهران‌دا نۆوه صنایعی ایله باغلی بیر تدبیره قاتیلان ایرانین اتم انرژیسی قورومو باشقانی محمد اسلامی، اولوسلارآراسی اتم انرژیسی آژانسینین سون راپورونون دوغرو اولمادیغینی سؤیله‌یرک،
"آژانسین یئنی مفتیشلریندن بیری، ایرانین شهید علی محمدی (فردو) اورانیوم زنگینلشدیرمه تاسیسینده‌کی چالیشما پروسه‌سینده اعلان ائدیلمه‌میش بیر دییشیکلیک ائدیلدیگینی یانلیشلیقلا راپور ائتمیش. آنجاق داها اؤنجه‌کی مفتیشلر تاسیسه گلنده اونلارا وئریلن آچیقلامالاردان سونرا سؤزو گئدن مفتیش خطاسینی آنلامیشدی. اولوسلارآراسی اتم انرژیسی آژانسی کاتیبلیگی ایله ائش‌گۆدوم ایچینده چالیشدیقدان سونرا دا قونو فعلی اولاراق چؤزومه قوووشدورولموشدور" دئدی.
اولوسلارآراسی اتم انرژیسی آژانسینین دۆنن عضو اؤلکه‌لره گؤندردیگی راپور‌دا، فردوداکی نۆوه تاسیسده اورانیومو یۆزده ۶۰ صافلیغا قدر زنگینلشدیره‌ن ایکی ای‌آر-۶ سانتریفوژ زنجیری آراسینداکی آرا باغلانتیدا اعلان ائدیلمه‌میش بیر دییشیکلیک" ائدیلدیگینین معین اولوندوغو بیلدیریلمیشدی.
راپور‌دا، دییشیکلیگین نئجه ائدیلدیگی ایله باغلی بیلگی وئریلمه‌دیگی قید ائدیلمیشدی.
ایران، نوامبر آییندا، فردوداکی نۆوه تاسیسده اورانیومو یۆزده ۶۰ صافلیقدا زنگینلشدیرمه‌یه باشلامیشدی.
