ائرمنی ژنرال حبس ائدیلیب

ائرمنیستاندا سلاح‌لی قوه‌لرین کشفیات ایداره‌سی‌نین کئچمیش رئیسی و باش قرارگاه رئیسی‌نین معاوینی ژنرال آراییک هاروتونیان جبهه خطینده وظیفه‌سینه اعتینا‌سیزلیق گؤسترمکده اتهام اولونا‌راق حبس ائدیلیب.

ائرمنیستانین رسمی خبر آژانسی "آرمن پرس"ده یازی‌لانا گؤره، حبسی ائرمنیستان ساووجیلیغی رسمی‌لری ده تصدیقله‌ییب.

ژنرال آراییک هاروتونیانا دسامبرین 13-ده 2-جی قول اوردو قوموتانلیغی زامانی 2021-جی ایلین می آییندا گغارکونیک منطقه‌نین کوت و ورین شورجا کندلری یاخینلیغینداکی بؤلگه‌ده ائرمنی و آذربایجان‌لی عسگرلر آراسیندا باش وئرمیش توققوشما ایله باغلی "وظیفه سهل انگارلیغی" ماده‌سی ایله اتهام ایره‌لی سورولوب.

دسامبرین 14-ده حبس ائدیلن آراییک هاروتونیان باره‌سینده قطعی حبس قراری چیخاریلیب.

قئید ائدک کی، آراییک هاروتونیان قول اوردو قوموتانی اولدوق‌دان بیر نئچه آی سونرا باش قرارگاه کشفیاتی رئیسی و باش قرارگاه رئیسی‌نین معاوینی وظیفه‌سینه تعیین ائدیلمیشدی.