تورکیه، روسیا و ایران نوماینده لری آستانادا یئنه بیر آرایا گله‌جک
تورکیه، روسیا و ایران نماینده هئیت‌لری 19-جو دفعه آستانادا یئنه بیر آرایا گله‌جک.
نوامبرین 22-23 تاریخ‌لرینده قازاخیستانین پایتاختی آستانادا سوریه ایله باغلی آستانا دانیشیق‌لاری‌نین گارانتی اؤلکه‌لری اولان تورکیه، روسیا و ایرانین نوماینده هئیت‌لری بیر آرایا گله‌جک.
آیبک سمادیاروو قازاخیستان خاریجی ایشلر ناظیرلیگی‌نین هفته‌لیک مطبوعات کنفرانسیندا وئردیگی آچیقلامادا بیلدیریب: "سوریه اوزره 19-جو آستانا دانیشیق‌لاری نوامبرین 22-23 تاریخ‌لرینده پایتاخت آستانادا کئچیریله‌جک و ضامین اؤلکه‌لر اولان تورکیه، روسیا و ایران نوماینده هئیت‌لری بورادا بیر آرایا گله‌جک.
سوریه حکومتی ایله موخالیفتین ده ایشتیراک ائدجگی گؤروش‌لرده بیرلشمیش میللت‌لر تشکیلاتی‌نین (بمت) سوریه اوزره خصوصی نوماینده‌سی گیر پدرسون دا اولا‌جاق.
بمت، اوردون ، لوبنان و عراق دانیشیق‌لاردا موشاهیدچی قیسمینده ایشتیراک ائده‌جک‌لر.
ایکی گون داوام ائده‌جک دانیشیق‌لاردا سوریه-ده‌کی عمومی وضعیت، اینسانی، سوسیال، اقتصادی پروبلئم‌لر، گیروو‌لارین آزاد ائدیلمه‌سی، ایتکین دوشموش شخص‌لرین آختاریشی کیمی مسئله‌لر موذاکیره اولونا‌جاق.
سوریه-لی قاچقین‌لارین وطن‌لرینه قاییتما‌لاری اوچون شرط‌لر، اؤلکه‌نین یئنی‌دن قورولماسی اوچون بمت تهلوکه‌سیزلیک شوراسی‌نین 2642 سایلی قطعنامه‌‌سی چرچیوه‌سینده اولوسلار آراسی توپلومون سعی‌لرینی سفربر ائتمک کیمی مؤوضوع لار باره‌ده ده فیکیر موبادیله‌سی آپاریلا‌جاق.
ضامین اؤلکه‌لرین نوماینده هئیت‌لری ایله بمت-نین قاچقین‌لار اوزره مرکزی کمیسارلیغی و اولوسلار آراسی قیزیل خاچ جمعیتی‌نین نوماینده‌لری آراسیندا ایسه محبوس‌لارلا باغلی ایشچی قروپ‌لارین گؤروش‌لری کئچیریله‌جک.
