رئیسی: ایرانین تورکیه و آذربایجانلا درین اینانج و مد‌نی باغلاری وار

ایران جمهورباشقانی ابراهیم رئیسی، ترور و متشکل سوچلارلا موباریزه‌نین، تهران و آنکارا آراسین‌دا امکداش‌لیق محورینی اولوشدورابیله‌جگینی سؤیله‌دی.

ایران جمهورباشقانلیغیندان وئریله‌ن بیلگییه گؤره، رئیسی دونن تهران‌دا اولان خاریجی ایشلر باخانی مؤولود چاووش‌اوغلونو قبول ائتدی.

ایران و تورکیه‌نین، ایلیشکیلری ایندیکی سویه‌دن چوخ طرفلی امکداشلیغا یوکسلتمه‌یه حاضر اولماسی لازیم اولدوغونو دئیه‌ن رئیسی اوزون مدت‌لی امکداش‌لیق مموراندومونون حاضرلانماسی ایله ایکیلی ایلیشکی‌لرین اولوسلارآراسی سویه‌یه چاتدیریلابیله‌جگینی بیلدیردی.

ایران و تورکیه آراسین‌دا یاخین ایلیشکیلرین بؤلگه‌ده باریش و ثابت‌لیگه خیدمت ائد‌جگینی سؤیله‌ین رئیسی،

"ایکی اؤلکه آراسین‌دا بؤلگه‌سل امکداش‌لیق کۆره‌سل آلاندا امکداشلیغا چئوریلمه‌لی‌دیر. تروریزم و متشکل سوچلارلا موباریزه تهران و آنکارا آراسین‌دا امکداش‌لیق محورینی تشکیل ائده‌بیلر. ایران بو ساحه‌ده امکداشلیغین سویه‌سینی یوکسلتمه‌یه حاضردیر" دئدی.

تیجارت و اقتصادی امکداشلیغین آرتماسینین خالقلارین چیخارینا اولدوغونو قید ائد‌ن رئیسی؛ تورکیه ایله ایران آراسین‌دا امکداش‌لیغی گلیشدیرمکله دونیادا معادله‌لره تأثیر ائده‌بیله‌جکلرینی بیلدیردی.

رئیسی،

«ایرانین تورکیه و آذربایجانلا قونشولوق ایلیشکیلرین‌دن اؤته درین اینانج و مد‌نی باغلاری وار» دئدی.

خاریجی ایشلر باخانی چاووش‌اوغلو دا ایرانلا امکداش‌لیغی گلیشدیرمک ایسته‌دیکلرینی بیلدیردی.

"ایرانین یئنی حکومتینی نتیجه آلیجی بیر حکومت کیمی گؤروروک. تهرانلا امکداش‌لیق سویه‌سینی ممکن قدر آرتیرماق عزمینده‌ییک" دئدی

قافقازدا تیجاری ایلیشکی‌لرین و ثابت‌لیگین آرتیماسی اوچون ایرانلا امکداش‌لیغی گئنیشلندیرمه‌یی هدفلدیکلرینی بیلدیره‌ن چاووش‌اوغلو ترورلا موباریزه‌ده ایرانلا امکداشلیغین اؤنمینی وورغولایدی.

چاووش‌اوغلو تویتئر حسابین‌دان آچیقلاماسین‌دا ایسه:

"ایران جمهورباشقانی ایله تیجارت، سرمایه‌لر و تروریزمله موباریزه‌ داخیل ایکی‌لی ایلیشکی‌لریمیز ایله بؤۀگه‌میزده‌کی سون گلیشمه‌لری اله آلدیق. ایلیشکیلریمیزی داها دا گلیشدیرمک اوچون قارشیلیق‌لی ایسته‌گیمیزی تصدیق ائتدیک" ایفاده‌لرینه یئر وئردی.