طالبان، پنجشیری آلدیغینی اعلان ائتدی
احمد مسعود، طالبانین پنجشیر و اطرافیندا "جهاد ائتمهسینین" دینی و یا انسانی بیر معناسی اولمادیغینی ایفاده ائتدی
افغانیستانین پنجشیر ایالتینی کنترل ائدن قروپلارین لیدئری احمد مسعود، طالبان گوجلرینین پنجشیر و اندارابدان چکیلمهسی حالیندا دانیشیقلارا حاضر اولدوقلارینی آچیقلادی.
کابلدا افغانیستان عالملر شوراسینین طرفلردن چاتیشمالاری سونلاندیرمالارینی و "مسلمان قانی آخیتماغا سون وئرمهلری" چاغریسیندان سونرا مسعود فیسبوک حسابیندا بیر آچیقلاما وئردی.
باریشجیل چؤزومدن یانا اولدوقلارینی ایفاده ائدن مسعود،
"اولوسال دیرنیش جبههسی، طالبانین، پنجشیر و اندارابداکی سالدیریلارینا و حربی عملیاتلارینی سونلاندیریرماسی حالیندا، قالیجی باریشا چاتماق اوچون ساواشی بیتیرمهیه حاضردیر. عالملر و اصلاحاتچیلار ایله گئنیش بیر توپلانتیدا بوتون طرفلرین اولدوغو دانیشیقلارا داوام ائتمک اومودونداییق" ایفادهلرینی ایشلتدی.
افغانیستان خالقینین اکثریتینین مسلمانلار اولدوغونو خاطیرلادان مسعود، طالبانین پنجشیر و اطرافیندا "جهاد ائتمهسینین" دینی و یا انسانی بیر معناسی اولمادیغینی ایفاده ائتدی.
تاجیک لیدئرینین چاغریسینا طالبان طرفیندن هله جاواب وئریلمهدی.
بو آرادا، طالبان افغانیستانین پنجشیر ایالتینی تامامیله اله گئچیردیکلرینی آچیقلادی.
تخمیناً ۱۷۰ مین اهالیسی اولان بؤلگهنین اکثریتی تاجیکلر اولوشدورور.
۲۰۰۱.جی ایلده کابلون طالبان دان آلینماسیندا رول اوینایان پنجشیرلیلر، عمومیتله بؤلگه ایچینده بیر یؤنتیجی ایله اداره ائدیلدیکلری اؤزلرینه فعلی بیر اؤزارکلیک تانییرلار.