ظریف ایرواندا: ارمنستانین تورپاق بوتؤولویو ایرانین قیرمیزی چیزگیسیدیر
ظریف، ارمنستان دؤولتی و باشباخان نیکول پاشینیانین گلهجهیه دوغرو آتیلیملاریندان "اؤوگو ایله" دانیشدی
ایران خاریجی ایشلر باخانی محمد جواد ظریف ارمنستانین تورپاق بوتؤولویونون اؤلکهسینین قیرمیزی چیزگیسی اولدوغونو سؤیلهدی.
ایران خاریجی ایشلر باخانلیغینین رسمی سایتینین وئردیگی معلوماتا گؤره، ظریف بؤلگهسل گؤروشمهلری چرچیوهسینده آذربایجان و روسیادان سونرا قونومداشی آرا آیوازیانلا ارمنستاندا بیر آرایا گلدی.
ایکی اؤلکه آراسینداکی ایلیشکیلرین و بؤلگهسل مسئلهلرین مذاکیره اولوندوغو گؤروشمهده ظریف،
"ارمنستان جمهوریتی ده داخیل اولماقلا بؤلگهدهکی بوتون اؤلکهلرین تورپاق بوتؤولویو، مستقیللیگی و میلی اگمنلیگی اؤنملیدیر. ارمنستانین تورپاق بوتؤولویو ایرانین قیرمیزی چیزگیسیدیر" دئدی.
ارمنستانی ایرانین "اؤنملی بیر قونشوسو" اولاراق دگرلندیرن خاریجی ایشلر باخانی ظریف، ارمنستان دؤولتی و باشباخان نیکول پاشینیانین گلهجهیه دوغرو آتیلیملاریندان "اؤوگو ایله" دانیشدی.
گؤروشمهده ارمنستان خاریجی ایشلر باخانی آیوازیان دا ایکی اؤلکه آراسینداکی یاخشی قونشولوق و دوستلوق ایلیشکیلرینه وورغو ائتدی.
ایرانین ارمنستانین دؤردونجو اقتصادی اورتاغی اولدوغونو بیلدیرن آیوازیان ایلیشکیلرین گلیشدیریلمهسینین اؤنمینی دیله گتیردی.
گؤروشمه چرچیوهسینده ایکی اؤلکه آراسیندا بانکچیلیق، نقلیات، ایران محصوللارینین صادراتی و آراز چایینین اطراف چئورهسی ایله باغلی مسئلهلرین ده مذاکیره ائدیلدیگی بیلدیریلدی.
ارمنستان باشباخانی پاشینیان ایله ده گؤروشمهسی پلانلانان ظریفین بو اؤلکهدهکی دانیشیقلارینین آردیندان گورجوستان و تورکیهیه سفر ائتمهسی
گؤزلنیلیر.