زنگنه: هئچ بیر قایغیمیز یوخ
"ایرانین نفت صادراتی سون گونلرده آرتماقدادیر و پولو دا گلیر"
ایران نفت باخانی بیژن نامدار زنگنه اؤلکهسینین نفت ساتیشلارینین سون گونلرده آرتدیغینی و تحریملر گؤتورولدویو تقدیرده قیسا مدتده بازار تاپابیلهجکلرینی آچیقلادی.
تهراندا گئچیریلهن ۲۵جی نفت، طبیعی گاز، پتروشیمی و آریندیراق سرگیسینده ایشتیراک ائدن زنگنه، آمریکانین تحریملری و صادرات ایله باغلی معلومات وئردی.
ایران نفت صنایعینه قارشی آمریکانین تحریملرین اوغورسوز اولدوغونو ادعا ائدن زنگنه،
"ایرانین نفت صادراتی سون گونلرده آرتماقدادیر و پولو دا گلیر. الدن گئدن بازارین قایتاریلماسی ایله باغلی هئچ بیر قایغیمیز یوخ. تحریملر لغو ائدیلسه، موشتریلر یئنیدن بیزه گلر چونکو ساتیجیلاری چئشیدلندیرمک ایسترلر. تحریملر لغو ائدیلسه قیسا زاماندا بازار تاپاریق و اسکی شرطلره قاییداریق".
نفت موبادیلهسی اوچون هئچ کیمله دانیشمادیقلارینی وورغولایان زنگنه، تحریملر هله قالدیریلمادیغی اوچون نفت ساتیشی ایله ایلگیلی آمار پایلاشمایاجاغینی سؤیلهدی.