ایران و اوکراینا آراسیندا محکوم موبادیله‌سی
جاسوسلوقلا سوچلانان ایران وطنداشی، اوکراینا پرزیدنتی پوروشنکونون تاپشیریغی ایله دونن اؤلکه‌سینه گؤندریلدی
ایران و اوکراینا آراسین‌داکی محکوم موبادیله‌سین‌ده، جینایت سوچلاماسی ایله اعداملا یارغیلانان اوکراینالی دنیزچی ایله ایران آدینا جاسوسلوق ائتمکله سوچلانان بیر ایرانلی اؤلکه‌لرینه قایتاریلدی.
اوکراینا خبر آژانسی اونیانین خبرینه گؤره، ایران‌دا جینایت سببیله اعداملا یارغیلانان اوکراینالی دنیزچی آندری نوویجچکوو ایله اوکراینادا ایران آدینا جاسوسلوقلا سوچلاناراق ۱۱ ایل حبسه محکوم ائدیله‌ن علی آدلی شخص موبادیله ائدیلدی.
جاسوسلوقلا سوچلانان ایران وطنداشینین اوکراینا پرزیدنتی پوروشنکونون تاپشیریغی ایله دونن اؤلکه‌سینه گؤندریلدیگی قید اولوندو.
اوکراینالی دنیزچی نوویچکووون ایسه بو گون اوکراینایا قاییتدیغی بیلدیریلدی.
ایران وطنداشی محکوم، ۲۰۱۶دا اوکراینادا داوام ائتدیردیگی دکترا تحصیلی زامانی خارکوو فیزیک و تکنولوژی انستیتوسون‌دا وظیفه‌لی بیر دوستونون گیزلی حربی رادیو استخبارات تکنولوژیلرینی ساتماسینا آراچی‌لیق ائتمکله سوچلانمیشدی. اتهاملاری قبول ائتمه‌یه‌ن ایرانلی متهم محکمه طرفین‌دن ۱۱ ایل حبسه محکوم ائدیلمیشدی.
اوکراینالی نوویچکوو دا ۲۰۱۷ده ایکینجی کاپیتان اولاراق وظیفه ائتدیگی ایرانلی بیر گمینین چالیشانلارین‌دان محمد آدلی شخصی اؤلدوردویو و بو سببله ده اعداملا یارغیلانیردی.
