ولیعهده سوء قصد ادعاسی
ایرانین یاری رسمی خبر آژانسی فارس، عربستان تاختینین وارثی، ولیعهد محمد بن سلمانین سوء قصد گیریشیمی ایله قارشی قارشییا قالدیغینی یازدی
عربستان ولیعهدی محمد بن سلمانا سوء قصد تشکیل ائدیلدیگی ادعا ائدیلدی.
ایرانین یاری رسمی خبر آژانسی فارس، عربستان تاختینین وارثی، ولیعهد محمد بن سلمانین سوء قصد گیریشیمی ایله قارشی قارشییا قالدیغینی یازدی.
عربجه یاییملانان مرات الجزیرهیه دایاندیریلان خبره گؤره، شاهزاده محمدی اؤلدورمهیه چالیشان شخص یئنه عربستان کرال عائلهسیندن بیر پرنسدی. عینی خبرده شاهزاده محمدین ساغلیق وضعیتینین یاخشی اولدوغو، سوء قصدچی شاهزادهنین ایسه توتوقلاندیغی ایفاده ائدیلدی.
فارس خبر آژانسینا گؤره، بؤلگهنی یوروملایان متخصصلر کرال سلمان بن عبدالعزیزین گؤزلنیلندن داها قیسا بیر مدت ایچینده تاختدان واز گئچهجیینی سؤیلهییر. آدی آچیقلانمایان سوء قصدچی شاهزادهنین، ولیعهد شاهزاده محمدین تاختا اوتورماسینی انگللهمک اوچون بئله بیر سالدیری گرچکلشدیردیگی دانیشیلیر.
سعود سارایینا دایاندیریلان راپورلارا گؤره کرال سلمان بن عبدالعزیز، تاختدان واز گئچیب صلاحیت، مسئولیت و عنوانینی اوغلو شاهزاده محمده بوراخدیغینی ایفاده ائدن بیر کاست حاضیرلادی بئله. آنجاق بو کاستین یاییملانماسی اوچون دوغرو زامان گؤزلنیلیر.
قارداشی اوغلو و اسکی ولیعهد شاهزاده محمد بن نایفی ائو حبسینده توتدوغو بیلدیریلن کرال سلمانین بو آی ایچینده یورددیشینا چیخاجاغی و اوغلونو وکیل آتایاجاغی دئییلیر.