“PKK” tağın ber qat çın yözen kürsätte
Urlanğannan yaqınça altı yıldan soñ 13 törek watandaşınıñ ğailäläre, qızğanıç, alarnı canlı bularaq tügel, tabutlarnıñ êçendä öylärenä qaytuın kürdelär.
Söygän keşeläre PKK terror oyışması tarafınnan urlanğan ide.
Cansız tännäre Törkiyäneñ “PKK”ğa qarşı oyıştırğan “Pänçä Börket-2” operaśiyäse waqıtında Tön’yaq Ğıyraqta sıyınır urın bularaq qullanılğan mäğarädä tabıldı.
12se yaqın distanśiyädän başlarınnan, berse dä cilkäsennän atıp üterelgän ide.
Törek xökümäte “PKK”ğa qatı zarar kiterüen äytä.
Mäwlüt Çavuşoğlu, Törkiyä Tışqı êşlär ministrı:
““PKK” häm “YPG”ne sörep çığarğançığa çaqlı häm êçtän, häm dä çiklärebezneñ ar’yağında terror belän köräş operaśiyälären däwam itäçäkbez. Urlağan 13 gäyepsez keşene üterep, “PKK” terror oyışması, gel yasağanı kebek, xıyanäten kürsätte. Ämma qannarı buş urınğa qoyılmadı. Bez bu terrorçılarnı quıp çığaraçaqbız.”
Törkiyä şuşı ütereş belän bäyle bularaq dönyanıñ dürt ber yağınnan qayğınamälär aldı, läkin Änkara könbatış illären “PKK” häm “YPG”gä qarşı tağın da kisken totış kürsätergä çaqıra.
Räcäp Tayyip Ärdoğan, Törkiyä İlbaşı:
“1984tän birle 30 meñnän kübräk tınıç xalıqnı üterdelär
Aralarında bäbilär, balalar, olı yäş’tägelär häm xatın-qızlardan
igençelär, hönärçelärgä qadär, cämğiyätebezneñ här qatlamınnan keşe bar ide. Gäyepsez grajdannarnı üterdelär. Şuña kürä dönyanı monı kürergä, qabul itärgä çaqırabız. Bayden äfände, bu terror oyışmasınıñ çınlıqta ni buluın tanığız zinhar.”
İlbaşı ber NATO äğ’zaseneñ niçek itep ber terror oyışmasın başqa ber NATO äğ’zasenä qarşı qorallandıra aluın sorıy.
10nçı fevral’dä başlatılğan operaśiyädä öç ataman belän bergä 48 PKK terrorçısı üle kileş qulğa töşerelde häm ike terrorçı da totqarlandı.
