Ärdoğan 19nçı may uñayınnan yullama yasadı
Törkiyädä bügen Atatörekne iskä alu, yäş’lek häm sport bäyräme
Törkiyä ilbaşı Räcäp Tayyip Ärdoğan 19nçı may - Atatörekne iskä alu, yäş’lek häm sport bäyräme uñayınnan yullama yasadı.
Ul monnan 105 yıl êlek Samsunda başlanğan häm Milli köräştä ciñü belän tögällägän 1919nçı yılnıñ 19nçı may waqıyğalarınıñ köçle Törkiyäne tözüdä täwge nigez taşı quyılğan data buluın assızıqladı.
“Bu kön millätebezneñ doşman yawına qarşı ilneñ här poçmağınnan kütärelgän bäysezlek häm kiläçäk ruxınıñ çatqısı bula”,-di Ärdoğan. Ul Samsunda qabınğan bäysezlek fakelınıñ Amasiya, Ärzurum, Sivas häm şunnan soñ Änkara belän böten Anadoluğa taraluın, 19nçı may ruxınıñ törek milläteneñ iñ zur baylığı, iñ zur kapitalı buluın söyläde.
“Awırlıqlarğa qarşı toru, üzsüzlelek, ışanıç, täwäkkällek belän bergäläp köräşüneñ mäğ’näse bu ruxta saqlana. İlebez, yulında oçrağan här törle basımğa, provokaśiyägä qaramıyça, tizlek alğan üseş, alğarış, nığu köräşen barı 19nçı may ruxın, asılın, prinśipların, idealların häm maqsatların saqlap qına däwam itä alabız”-di Törkiyä ilbaşı.
Ärdoğan yäş’lärgä möräcäğat’ itep isä bolay dide: “Sez - yaña “Törkiyä ğasırı”nıñ tözüçeläre, şundıy üzañ häm üz-üzegezgä ışanıç belän tarixığıznı, bügenge tormışnı saqlap, berläşegez, ber-beregez belän qardäşlek bäyläneşlären üsteregez. Sez, yäş’lärebez, häm ğaziz millätebezne 19nçı may - Atatörekne iskä alu, yäş’lek häm sport bäyräme belän täbrik itäm, Ğazıy Mostafa Kämal häm Bäysezlek suğışıbıznıñ barlıq kaharmannarın tağın ber qat xörmät belän iskä alam”.
