Ärdoğan: "Netan'yaxu cawap biräçäk"

Törkiyä ilbaşı Räcäp Tayyip Ärdoğan AK partiyäneñ Törkiyä Böyek Millät Mäclesendäge utırışında çığış yasap, tağın ber qat iğ’tibarnı Ğazzä mäs’äläsenä yünältte.

“Netan’yaxu häm genośidqa yärdäm itüçelär tügelgän här tamçı qan öçen cawap biräçäk. Bez dä alarnıñ xoquq qarşında cawap totuları öçen tırışaçaqbız. İzrailneñ Ğazzädä tuqtap qalaçağın uylamağız. Bu terrorçı däwlät tuqtatılmasa, wäğ’dä itelgän cirlär illyuziyäse belän irtäme-kiçme Anadoluğa qulın suzaçaq”,- dip söyläde Ärdoğan.

Ul üz cirläreneñ kiläçäge öçen dä suğışuçı, Anadolunı da yaqlawçı Fälästin qarşılıq xäräkäte “Xamas”nıñ yanında toraçaqların äytte.

Ärdoğan İzrail yağınıñ qara propagandasına da reakśiyä belderde. “Sionist üterüçelär häm yärdämçeläreneñ bezne nişanğa aluı qurqaçaq yäisä oyalaçaq närsä tügel, kükrägebezdä ğorurlanıp yörtä torğan maqtaw medale”,-dide ul.