İlbaşı Papa Franśiskqa xat cibärde

 İlbaşı idaräseneñ êlemtä bülege xäbär itkänçä, Törkiyä ilbaşı Räcäp Tayyip Ärdoğan katolik din ähele häm Vatikan däwlät başlığı Papa Franśiskqa Fälästin turında xat cibärde.

Ärdoğan üz xatında Törkiyäneñ gumanitar diplomatiya şiğare belän 2014 nçe yılda Qırım qanunsız annekśiyälängännän birle Ukrainanıñ cir bötenlegen yaqlawın häm fälästinle ğayepsez tınıç xalıqnıñ yäşäw xoquqın yaqlawnıñ berençe urında toruın belderde.

İlbaşı Törkiyäneñ 2023 nçe yılnıñ 7 nçe oktyabrendä İzrailneñ höcümnäre başlanğannan birle yaqınça 45 meñ tonna yärdäm cibärep Ğazzägä iñ zur yärdäm kürsätüçe ikençe il buluın assızıqladı. Ul Ğazzädän kiterelgän 429 keşeneñ Törkiyädä däwalanuın da belderde. 

”Keşelek Ğazzädä xalıqara xoquqnıñ ayaqlar astına salıp taptaluına röxsät itmäskä tiyeş. Suğış waqıtında qağılırğa yaramağan xastaxanälär, mäktäplär, mäçetlär, çirkäwlarne belä torıp bombalawğa qarşı tawışın kütärergä tiyeş. Fälästin -İzrail mäs’äläsen ğadel räweştä çişmiçä torıp Yaqın Könçığışta daimi tınıçlıq häm totrıqlılıq urnaştıru mömkin tügel. 1967 nçe yıl çiklärendä, başqalası Könçığış Qodüs bulğan bäysez, suveren häm geografik yaqtan integraśiyälängän Fälästin däwläten tözü häm anıñ xalıqara sistemanıñ tigez äğ’zası bularaq global’ sistemada üz urının aluı bik möhim” dide ilbaşı üz xatında.

Törkiyä ilbaşı soñğı waqıtta böten dön’yağa taralğan rasaçılıq, İslamofobiya häm ksenofobiya kebek cämğıyät’lär arasındağı tınıçlıq häm totrıqlılıqqa qurqınıç tudıruçı tendenśiyälärne isäpkä alğanda dön’yağa kiñ qırlı häm raśional’ säyäsät, barlıq şartlarda yaqlar belän dialog urnaştıra alğan aktyerlar kiräklegen assızıqladı.