“Törkiyä Süriyädä böten taraflar belän konstruktiv êlemtäsen däwam itterä”
Törkiyäneñ Berläşkän Millätlär Oyışmasındağı daimi wäkile, tulı wäqalätle ilçe Sädat Önal terrorçılıqnıñ Süriyäneñ säyäsi berlegenä häm cir bötenlege belän regional’ tınıçlıqqa häm totrıqlılıqqa qarşı iñ zur yanawğa äylänüen äytte
Tulı wäqalätle ilçe Önal, BMO İminlek Şurasında oyıştırılğan häm Süriyädäge säyäsi häm humanitar wazğıyät tikşerelgän utırışta çığış yasadı.
Süriyädä 13 yıl buyı xökem sörgän tartqalaşu arqasında humanitar, säyäsi, iminlek häm iq’tisadi torışnıñ naçarayuına işarät itüçe ilçe Önal: "Terrorçılıq Süriyäneñ säyäsi berlegenä häm cir bötenlege belän regional’ tınıçlıqqa häm totrıqlılıqqa qarşı iñ zur yanawğa äylände”, - dip äytte.
Önal, böten bäyläneşle taraflarnıñ çınlıqçı wazğıyätne bäyäläweneñ zarurlığın belderep, Süriyä tartqalaşuınıñ totrıqlı çişeleşe öçen töp ixtıyacnıñ Süriyä xalqınıñ kötkännäre belän ahäñle milli kileşüneñ täêmin itelüe buluın iskärtep uzdı.
Xalıqara cämäğätçelekneñ dä şuşı maqsatnı yaqlaw öçen ğomum totışın üzgärtüeneñ kiräklegenä basım yasawçı Önal: "Bu qısada säyäsi, iminlek häm humanitar ölkälärdä ike yaqlı bularaq ber-bersen nığıtqan barışlarğa aktiv qatnaşu täêmin itelergä tiyeş. Ber ük waqıtta qaçaqlarnıñ kire qaytuın ciñeläytergä häm irtä ternäklänüne soñğa qaldırmasqa kiräk”, - dip belderde.
Önal, bigräk tä 3 töp mäs’älädä qaraşlarnıñ üzgärtelüeneñ zarurlığın citkerep, bolardan berençeseneñ säyäsi barışnıñ BMOnıñ ciñeläytüçänlegendä yañadan canlandırıluı buluın äytep uzdı.
İkençe totış üzgäreşeneñ isä ber terror oyışmasına qarşı köräşne başqa ber terror oyışmasına tapşıru yalğışlığınıñ beterelüe buluın belderüçe Önal: "Süriyä demokratik köçläre” dip ataluçı törkem çınlıqta separatist ber oyışma. Ni süriyäle, ni dä demokratik. “PKK/YPG”neñ üze ul”, - dide.
Önal, öçençese bularaq isä qaçaqlarnıñ üzixtıyarıy, qurqınıçsız häm däräcäle qaytularınıñ tartqalaşunıñ çişeleşenä qarağan barışnıñ ber öleşe buluınıñ zarurlığına iğ’tibarnı yünältte.
Tulı wäqalätle ilçe Önal Törkiyäneñ Süriyädä tınıçlıq häm totrıqlılıq urnaştırıluına bulışlıq itü öçen böten taraflar belän konstruktiv êlemtäsen däwam itterep tırışlıq sarıf itäçägen iskärtep uzdı.
