AQŞ Törkiyägä 23 milliard dollarlıq qoral satırğa cıyına
Süz F-16 xärbi oçqıçları häm alarnı modernizaśiyäläw cıyılmaları turında bara
Amerika Quşma Ştatları däwlät departamentı Törkiyägä F-16 xärbi oçqıçların satu häm xäzer qulında bulğannarın modernizaśiyäläw mäs’äläsendä Kongressqa räsmi dokument cibärde. Bu xaqta AQŞ saqlanu iminlege xezmättäşlege agentlığı yazmaça belderde. Anda däwlät departamentınıñ Törkiyägä yaqınça 23 milliard dollar bäyäsendä 40 danä F-16 xärbi oçqıçı belän 79 modernizaśiyä cıyılması satunı raslawı äytelä.
Belderüdä Törkiyägä F-16larnı satunıñ NATO iminlege häm totrıqlılığı nisbätennän ähämiyätle buluı assızıqlana. Anı tormışqa aşıru öçen AQŞ idaräse cibärgän satu belderüeneñ Kongressta kire qağılmawı kiräk.
AQŞ Senatınıñ çit illärgä qoral satularda kontrol’ itü wazıyfası başqaruçı tışqı mönäsäbätlär komitetı räise Ben Gardin Törkiyägä F-16larnı satarğa röxsät itäçägen belderde. Wäkillär palatasınıñ tışqı mönäsäbätlär komitetı räise Maykl Makkaul da Şveśiyäneñ NATOğa äğ’zalığınıñ Änkarada raslanuına qanäğat’ qaluın häm älege wäzğıyät’tä Törkiyägä F-16larnı sataçaqların belderde.
