Ärdoğan Ukraina häm Somali liderları belän söyläşte

Törkiyä ilbaşı Räcäp Tayyip Ärdoğan Ukraina däwlät başlığı Volodimir Zelenskiy häm Somali ilbaşı Xäsän Şäyex Mäxmüt belän ayırım-ayırım telefonnan söyläşte.

İlbaşı apparatınıñ cämäğat’çelek belän êlemtä idaräsennän belderülärençä, Ärdoğan belän Zelenskiy arasında uzğan söyläşüdä Ukraina-Rusiyä suğışı, başqa regional’ häm global’ mäs’älälär qaraldı.

Ärdoğan äñgämä barışında Törkiyäneñ Ukrainada da, Fälästindä dä ağuçı qannı tuqtatu häm daimi tınıçlıq täêmin itü öçen zur tırışlıq quyuın belderde. Ul Ukrainada suğışnı tuqtatu öçen Törkiyäneñ ciñelläşterüçe rolen başqarırğa häm solıx söyläşülären üzendä qabul itärgä äzer buluın äytte.

Ärdoğan aşlıq koridorınıñ qabat yañartılıp funkśional’ xälgä kiterelüeneñ ähämiyätle buluın häm monıñ öçen diplomatik söyläşülärneñ däwam itüen söyläde

Törkiyä liderı belän Somali ilbaşınıñ telefon äñgämäsendä isä ike il arasındağı mönäsäbätlär, terrorçılıqqa qarşı köräş häm başqa mäs’älälär qaraldı. Ärdoğan Somalinıñ terrorçılıqqa qarşı köräşen yaqlawların, ike däwlät arasındağı xezmättäşlekneñ artıp däwam itäçägen söyläde. Ul, şulay uq, Somali belän Êfiopiya arasındağı kiyerenkelekneñ tögällänüe kiräklegen dä äytte.