Türkiyä: "Bez Fälästin xalqı belän bergä"

Törkiyä Böyek Millät Mäclese başlığı Mostafa Şäntop sośial’ mediadan yasağan belderüendä:

"Här Ramazan ayında bulğanı kebek yänä İzrail xärbi oçqıçları Ğazzäne bombalıy. İzrailneñ şuşı keşeleksez häm xoquqsız höcümen kisken räweştä gäyıplim. Keşelekneñ zolımnı ciñäçägenä bulğan ışanuıbız belän ciñüçe ğadellek häm däräcäle Fälästin xalqı bulaçaq. Doğabız häm yaqlawıbız Ğazzäle qardäşlärebez öçen,” – dip äytte.

İlbaşı idaräse süzçese İbrahim Qalın da sośial’ media yazmasında:

“İzrailneñ Ğazzägä qarata xoquqsız häm äxlaqsız höcümnären läğnätlibez,” – diyıp: "İzrail xökümäte könnär buyı belä torıp alıp barğan qırıslıq säyäsäten xäzer ük tuqtatırğa tiyış. Bez Fälästin xalqı belän bergä. Fälästinle qardäşlärebezgä yaqlawıbız däwam itäçäk. Bu zolım, älbättä, betäçäk,” – dip belderde.

“Ğadellek häm üseş” partiyası ğomum başlığı wäkile Numan Kurtulmuş isä:

"Qamalış, êmbargo häm qamaw (blokada) astındağı Ğazzä qabat Ramazan könne İzrailneñ däwlät terrorçılığınıñ nişanı bula, cäberlängän Fälästin xalqın sionist qatıyllär (üterüçelär) bombalıy. İslam dönyası belän bergä xalıqara cämäğätçelek şuşı keşelek gäyıbenä batı tik tamaşaçı bulıp qına qala. Citär! Gäyıpläwdän tış terror däwläte İzrail xäzer ük tuqtatılırğa tiyış,” – süzläre belän reakśiyasın kürsätte.

“Cömhüriyät xalıq” partiyası ğomum başlığı häm “Millät” ittifaqınıñ İlbaşı namzäte Kemal’ Qılıçdaroğlu da höcümnän soñ gäyıpläw yullamasın bastırdı.

Qılıçdaroğlu: "İzrailneñ Ğazzägä qarşı höcümnären gäyıplim. Bezneñ urınıbız bilgele, bez Fälästin belän bergä,” – dip äytte.