Cir teträwdän soñ Türkiyägä 90 ildän qotqaruçılar kilde

Kaxramanmaraşta 6nçı fevral’dä bulğan häm 11 töbäkkä zıyan salğan cir teträwlärdän soñ 90 ildän êzläw-qotqaru törkemnäre Türkiyädäge êşçänleklärgä yärdäm itte. “Ğasır hälakäte” dip ataluçı zilzilälär bulğan urınnarda çit il törkemnäre yözlärçä keşene xaräbälärdän isän-saw çığardı.

Här tabiğıy afättäge şikelle ük Türkiyägä yärdämgä berençe bulıp kilgän däwlät Azärbaycan ide. Annan tulayım 899 keşelek törkem Kaxramanmaraşta êzläw-qotqaru êşçänleklärendä qatnaştı häm xaräbälärdän 53 keşene isän-saw çığardı.

Yärdämgä kilgän 89 ilneñ törkemnäre inde kire qaytıp kitte. Ä Azärbaycannan 309 keşelek törkem äle haman Kaxramanmaraşta wazıyfa başqara.

Çit il qotqaruçılarınıñ töbäktäge êşçänlekläre barışında kiçergän êmośional’ mizgellär kameralarğa êläkte. Cir teträwdän soñ Greśiyädän kilgän 67 keşelek êzläw-qotqaru törkeme Xatayda wazıyfa başqardı. Töbäkneñ İskändärun rayonındağı êşçänlekläre näticäsendä  alar 50 yäş’lek ir-at häm anıñ 6 yäş’lek qızın cimereklär astınnan isän-saw çığardı. Greklarnıñ ul mizgellärdäge xis-kiçereşlären böten dön’ya kürde. Qotqaruçılar 6 yäş’lek qıznı çığarğannan soñ qoçaqlaştı häm küz yäş’lären tıyıp qala almadı. Bu älege zilzilädä küñelgä señep qalğan küreneşlärdän berse ide.

Vengriyädän kilgän êzläw-qotqaru törkeme dä Xatayda yäş’ yarımlıq qıznı xaräbälärdän isän-saw çığarğannan soñ êmośional’ mizgellär kiçerde. Üz illäreneñ telekanalına interv’yuda êzläw-qotqaru törkeme wäkileneñ keçkenä balanı çığaruların söylägändä küñele tuldı häm bu küreneş böten Türkiyäne yılattı.

Çit il qotqaru törkemnäreneñ xäterlärgä kerep qalğan tağın ber mizgele - Germaniyädän Daniêl Lankersnıñ xaräbälär astındağı Zäynäp isemle xatın-qızğa êndäşüe ide. Ul êlemtägä kerü öçen törekçä-inglizçä süzlär qullandı. “Zäynäp xanım, Daniêl’ monda. Qurıqma” dip êndäşkän video sośial’ mediada bik küp keşe tarafınnan qaraldı.   

Cir teträwdä êzläw-qotqaru törkemnärennän tış bik küp ildän dürt ayaqlı duslar da êşçänleklärgä öleş kertte. 54 däwlättän 440 maxsus öyrätelgän êt xaräbälärdän bik küp keşeneñ isän-saw çığarıluında ähämiyätle rol’ uynadı.

Meksikalı törkemnär belän êzläw-qotqaru êşçänleklärenä yärdäm itü öçen Türkiyägä kiterelgän Proteo quşamatlı êt Adıyaman töbägendä wazıyfa başqarğanda ülde. Ul älege cirlektä 3 keşeneñ isän-saw çığarıluına öleş kertkän ide.