Çavuşoğlu: “Böten xalıqara cämäğätçelekkä tağın ber qat räxmät belderäbez”
Türkiyä Tışqı êşlär ministrı Mäwlüt Çavuşoğlu 6nçı fevral’dä barlıqqa kilgän, "ğasırnıñ fäläqäte” dip bäyälängän häm 11 vilayättä täêsirle bulğan Kahramanmaraş êpiśentrlı cirteträwlärdän soñ çit illärdän zur yärdäm kürülären belderde
Çavuşoğlu başqala Änkarada Livan tışqı êşlär häm qaçaqlar ministrı Abdallah Buhabib wä Däwlät êşläre häm transport ministrı Ali Hamiyyä belän söyläşüennän soñ oyıştırılğan urtaq matbuğat oçraşuında çığış yasadı.
Zilziläneñ berençe könnärennän böten oyışmalarnıñ cirlektä buluın häm xalıqara êzläw-qotqaru törkemnäreneñ Türkiyägä kilüe öçen kiräkle koordinaśiyanı başqaruların añlatuçı Çavuşoğlu: "102 il yärdäm täq’dimen yasadı. 90 ildän êzläw-qotqaru häm sälamätlek saqlaw törkemnäre kilde. Qır xastaxanäläre qorıldı häm zur yärdämnärne kürdek. Böten xalıqara cämäğätçelekkä tağın ber qat räxmät belderäbez,” – dide.
Çavuşoğlu çit ildän kilgän çatır sanınıñ 93 meñ 637gä citüen, konteyner belän bäyle êşçänlekneñ däwam itüenä basım yasadı.
Berläşkän Millätlär Oyışmasınıñ aşığıç çaqıru mexanizmın şunda uq ğamälgä kertüen, 3 ay êçendä Türkiyägä 1 milliard dollarlıq aşığıç ixtıyaclarnıñ qanäğätländerelüe öçen yärdäm çaqıruın yasawın xäterlätüçe Mäwlüt Çavuşoğlu: "BMO belän bergä törle illärdän biregä öleş kertüçelärne küräbez,” – dip äytte.
Awrupa Berlegeneñ Türkiyägä yärdäm öçen xalıqara konferenśiya oyıştıruın iskärtep uzuçı Türkiyä Tışqı êşlär ministrı kiläçäk yärdämneñ qullanıluı öçen oyışmalar belän söyläşülären belderde.
Livan ministrı Buhabib isä: "(Türkiyä belän) Qardäşlek bağlanışlarıbız çiksez, şuşı awır könnärdä qardäş Türkiyägä yärdäm ittek. Şunı beläbez: awır könnärebezdä dä Türkiyä bezneñ belän bergä ide,” – dip äytte.
