Törek fänni törkeme Antarktikağa ayaq bastı

7nçe Milli Antarktika êkspediśiyäse qısalarında yulğa çıqqan Türkiyä törkeme 68 säğat’ däwam itkän yulçılıqtan soñ aq qıytğağa ayaq bastı.

24 keşelek fänni törkem İstanbuldan 30nçı ğıynvarda quzğaldı. Başta alar Braziliya başqalası San-Pauluğa oçtı. Barlığı 4 törle oçqıçta 22 säğat’lek säfärdän soñ 13 meñ 800 çaqrım yul uzıp 3nçe könneñ axıqında 2 tonnağa yaqın texnik cihazlar belän Antarktikanıñ King-Djordj utrawına barıp cittelär. Älege cirlekkä yaqın sulıqlarda Çili bayraqlı 80 metr ozınlığındağı Betanzos tikşerenü korabı bar. Türkiyä törkeme köymälär belän şunda yul aldı. Biredä alar 30 könnän artıq êşçänlek alıp baraçaq.

Fänni törkemneñ ber atna buyı yözep Antarktikadağı törek tikşerenü lagere urnaşqan Xorsşu utrawına baruı kötelä.

TÜBİTAK Marmara tikşerenü üzäge qotıp tikşerenüläre institutı mödire häm 7nçe milli Antarktika fänni êkspediśiyäse koordinatorı, professor Burcu Özsoy säfärdä 19 törek häm 3 çit il ğalime qatnaşuın citkerde. “18 törle proyekt başqaraçaqbız. Monnan tış, TÜBİTAK 2204-C liśey uquçıları Qotıp tikşerenüläre proyektı yarışı çaqıruı qısalarında TEXNOFESTta iğ’lan itelgän 3 ciñüçebez dä bezneñ belän Antarktikağa kilde. Tabiğat’tä tarqala aluçı plastik proyektlarınıñ täcribäsen ütkäräçäklär,”-dide ul.

Özsoy tormışqa aşırılaçaq proyektlarınıñ bik kiñ diapozonlı buluın assızıqladı. Anda cir beleme dä, fizika da, sośial’ tarmaq ta, yäşäw fäne dä bar.

Türkiyäneñ Antarktika kileşülär sistemasında konsul’tant-il statusı aluı maqsatı belän här yıl daimi bularaq fänni êkspediśiyälär ütkärüe häm andağı tikşerenülärneñ xalıqara fänni jurnallarda basılıp dön’ya ädäbiyatına kerüe zur ähämiyätkä iyä. Şuna kürä, belgeçlärneñ andağı tikşerenüläre Türkiyäneñ xalıqara mäydanda tanıluına öleş kertergä tiyeş.