Finlyandiya: “Türkiyäneñ möräcäğätebezne tiz arada raslawın telibez”

Sanna Marin häm Ulf Kristersson Şveśiya başqalası Stokgolm'da urtaq matbuğat oçraşuın oyıştırdı.

Marin häm Kristersson, illäreneñ iminlegeneñ ber-bersenä bäyle buluın belderep, NATOğa äğ’zalek möräcäğäte barışın bergä başlatqan kebek bergä tögälläp yomğaqlarğa teläwlären äytte.

Finlyandiya Baş ministrı Marin, NATOğa äğ’zalek möräcäğäten Şveśiya belän bergä yasawların häm barışnı bergä tämamlarğa teläwlären belderep: "Bez bergä êşlibez. Bu mäs’älädä här kön bik yaqın êlemtädä bez. Älbättä, häm Türkiyäneñ häm dä Vengriyanıñ möräcäğätebezne tiz arada raslawın telibez,” – dip iskärtep uzdı.

Marin Rusiyä-Ukraina suğışı arqasında Awrupada iminlek tärtibeneñ daimi bularaq üzgärüenä häm şuşı säbäp belän NATOğa quşılırğa teläwlärenä işarät itte.

Dini mäs’älälärgä xörmätneñ Finlyandiya qanunnarına kertelüen iskärtep uzuçı Marin Şveśiya äğ’zalege ozaq waqıt alğan oçraqta närsä bulaçağı turındağı sorawğa: "Wazğıyätneñ sıynıftağı şayanşuq bala kebek täq’dim itelüe säyır. Şveśiya da NATO äğ’zase bulu öçen soralğannarnı üti. Şveśiya “problema tudıruçı” bularaq täq’dim itelgän bu atmosferanı yaratmıym,” – dip cawap birde.

Şveśiya Baş ministrı Kristersson da, Finlyandiya belän yaqın mönäsäbätlärgä iyä buluların belderep, NATO äğ’zalege öçen yulğa bergä çığuların häm bergä däwam itülären äytte.

Kristersson Türkiyä, Finlyandiya häm Şveśiya qul quyğan öç yaqlı memorandumnı telgä alıp: "Bügenge Kabinet cıyılışında xökümätneñ terrorçılıq belän köräş turındağı qanun täq’dimen räsmiläşterdek. Ölge martta parlamentqa cibäreläçäk häm yaña terrorçılıq belän köräş qanunnarı 1nçe iyün’dä ğamälgä keräçäk. Bu Şveśiyanıñ terrorçılıq belän köräş mäs’äläsendäge ozaq waqıtlı burıçınıñ nigez taşı,” – dide.

Soñğı waqıtta Türkiyä belän yäşängän kiyırenkelekkä häm Şveśiyadağı provokaśiyälärgä tuqtalıp uzuçı Kristersson: "Bu ğamällär yul açqan qanäğätsezlekne añlıybız häm urtaqlaşabız. Böten şveśiyälelärgä yullamam bik ğadi: wazğıyätne tınıçlandırıyq häm zur räsemgä häm çınlap torıp möhim äybergä: NATOnıñ tulı äğ’zaläre bularaq Şveśiyanıñ milli iminlegen arttıruğa yünälik,” – dip basım yasadı.

Kristersson Şveśiyanıñ öç yaqlı memorandum qısalarında üz burıçın ütäyäçägen iskärtep uzdı.