Türkiyä parlamentı spikerı Garrinıñ kitabın tänqıyt'läde

Türkiyä Böyek Millät mäclese räise Mostafa Şäntop Angliyä patşa ğailäsennän ayırılğan prinś Garrinıñ Äfğanstan belän bäyle belderülärenä reakśiyä citkerde. Ul başqala Änkarada oyıştırılğan “21nçe ğasırda keşe xoquqlarınıñ kiläçäge” temalı xalıqara konferenśiyädä çığış yasadı. Anda Şäntop prinś Garrinıñ “Spare” (Almaş) dip isemlängän bäxäsle memuarlarına tuqtaldı. Ul kitaptağı “Äfğanstanda xezmät ittem. 25 keşene üterdem. Alarnı keşe bularaq kürmi idem. Ägär keşe bularaq kürsäm, üterä almas idem. Alarnı keşegä sanamas öçen öyränü uzdıq” digän cömlälärgä qarata rizasızlığın belderde.  

Şäntop prinś Garrinın älege süzläreneñ barı aq Awrupalınıñ qaraşı tügellegen, ber ük waqıtta ber mädäniyät, poziśiyä, töşençäne kürsätüen assızıqladı.  

“Yäğ’ni awrupalı aq keşe Äfğanstanda yäşäwçe 25 keşeneñ keşe bulmawına qarar qıla, üz-üzen ışandıra, alarnı üterä ala häm monıñ öçen hiç uñaysızlanmawın äytä. Şuña kürä bezneñ töp mäs’äläbez - paradigma,”-dip söyli Şäntop.

Türkiyä Böyek Millät mäclese räise ksenofobiya, islamofobiya, möselmannarnı doşman kürüneñ dön’yada bik küp ildä citdi problemalar kiterep çığarırlıq noqtağa kilüen assızıqladı.