Çavuşoğlu: “Türkiyä – global’ aktyor”
Tışqı êşlär ministrı Mäwlüt Çavuşoğlu Türkiyäneñ Afrikadan Aziyağa, Yaqın Könçığıştan Balkanğa qadär kiñ geografiyada ömetle illärdän berse buluın häm global’ diplomatiyada iñ ışanıçlı aktyorlardan bersenä äylänüen äytte
Çavuşoğlu başqala Änkarada Hacı Bayram Väli universitetında oyıştırılğan "Türkiyäneñ iniśiativalı häm humanitar tışqı säyäsäte” temalı konferenśiyanıñ açılışında çığış yasadı.
Bügen dönyada bik citdi problemalarnıñ, krizislarnıñ häm suğışlarnıñ buluın belderüçe Çavuşoğlu suğışlarnıñ häm bäreleşlärneñ 60%ınıñ Türkiyäneñ yaqın geografiyasında buluına işarät itte.
Çavuşoğlu bügenge dönyada barı tik fikerlär, iq’tisadi êşçänlek kenä tügel, yanawlar da global’ torışqa äylänüen, bäreleşlär, ênergetika häm azıq-tölek krizisı, terrorçılıq, klimat üzgäreşläre, ksenofobiya, İslam doşmanlığı häm tärtipsez (qanunsız) migraśiyanıñ oçraşılğan sınawlar buluın belderde.
Artqan xalıqara köndäşlekneñ böten keşelekkä yanawçı problemalar belän bergä urtaq çişeleşlärne tabunı awırlaştıruına, Berläşkän Millätlär Oyışması, Awrupa Berlege, Awrupa Şurası kebek xalıqara oyışmalarnıñ global’ problemalarnıñ xäl itelüendä citärlek bulmawına iğ’tibarnı yünältüçe Çavuşoğlu: "Mondıy awır çorlarda iniśiativanı üz östenä alaçaq, yul kürsätäçäk, äydäp baraçaq êşquarlıq ruxlı köçlärgä ixtıyac bar. Bügen şunı ğorurlanıp äytäm: Türkiyä bu köçlärneñ başında tora”, - dip iskärtep uzdı.
“Türkiyä Afrikadan Aziyağa, Yaqın Könçığıştan Balkanğa qadär kiñ geografiyada ömetle illärneñ başında tora”, - dip belderüçe Türkiyä tışqı êşlär ministrı: “Global’ problemalarnıñ qaysısına qarasağız da, barısında da Türkiyäneñ çişeleşneñ öleşe buluın kürep alasız,” – dide.
