“Türkiyä ğasırı”n tözü öçen nıqlı adımnar belän alğa barabız"

Türkiyä ilbaşı Räcäp Tayyip Ärdoğan 29 nçı oktyabr’ – Cömhüriyät bäyräme uñayınnan yullama yasadı.

Ul törek xalqın bäyräm belän qotladı, çit illärdäge wäkilçeleklärdä bu bäyrämne qotlawçılarğa da räxmätlären citkerde.

Türkiyä ilbaşı 99 yıl êlek bik qatlawlı şartlarda tözelgän Türkiyä Cömhüriyäten zamança śivilizaśiyälär däräcäsennän dä yuğarığa çığaru öçen özleksez köräş alıp baruların belderep bolay dide:

“Bez tormışqa aşırğan êş-ğamällär häm xezmät asqorması nigezendä “Türkiyä ğasırı”n tözü öçen nıqlı adımnar belän alğa barabız. Türkiyäne demokratiyäse ürnäk itep kürsätelgän, iq’tisadı küz qamaştırğan häm diplomatiyäse zur qızıqsınu belän küzätep barılğan ilgä äyländerdek. Global’ bilgesezleklär arta barğan däwerdä tınıçlıq, totrıqlılıq häm ğadellek urnaştıru tırışlıqlarıbıznı barlıq qatlawlar yuğarı bäyäli. Süriyädäge keşelek tragediyäsen beterüdän alıp Rusiya –Ukraina kirizisın çişügä qadär näticäle tışqı säyäsätebez belän tirä yaqta tınıçlıq häm mullıq buldırırğa tırışabız”.

Türkiyä ilbaşı milli keremnär belän çağıştırğanda iñ küp gumanitar yärdäm kürsätüçe il bularaq qayda cäberlängän, zolım kürgän, qıyın xäldä bulğan, yärdämgä moxtac keşe bulsa,  kilep çığışına, dinenä qaramıyça alarğa yärdämgä aşığuların belderde.

İlbaşı Ärdoğan : “Xalqıbıznı Cömhüriyät bäyräme belän qotlıym, sälämätlek tınıçlıq, iminlek telim”,-dide.