“Abdülhamid Han”nı ozattılar

Törkiyä ilbaşı Räcäp Tayyip Ärdoğan Märsin Taşucu portında “Abdülhamid Han” borawlaw korabın berençe wazıyfasına ozatu tantanasında qatnaştı. Ul üzeneñ çığışında bolay dip söyläde: “Abdülhamid Han” borawlaw korabı Törkiyäneñ ênergetika mäydanında yaña qaraşınıñ simvolı. 4 borawlaw köymäbez häm 2 seysmik tikşerenü köymäbez belän monnan soñ bez dä bu mäydanda bulabız”.

Ärdoğan Qara diñgezdä tabılğan tabiğıy gaznı kiläse yılda xalıqnıñ qullanışına birergä planlaştıruların äytte. “Qara diñgez gazınıñ berençe êtabı öçen kiräkle 10 qoyıdağı êşçänlekne beterep monnan kiläçäk tabiğıy gaznı 2023nçe yılda millätebez öçen qullanılışqa kertergä uylıybız,”-dide ul.

İlbaşı Urta diñgezdä bulaçaq borawlaw êşçänlegenä dä tuqtaldı. “Urta diñgezdä uzdırğan êzläw häm borawlaw êşçänlege üzebezneñ suveren mäydannarda. Monıñ öçen berkemnän dä röxsät yäisä raslaw alırğa kiräkmi,”-dide Ärdoğan.  

Ul “Abdülhamid Han” korabın Antaliyä töbägeneñ Gazipaşa rayonına 55 çaqrım yıraqlıqtağı Yörüklär-1 qoyısına ozatuların häm monıñ Urta diñgezdäge külämle êş planınıñ berençe adımı buluın citkerde.  

Ärdoğan Twitter akkauntında borawlaw köymäse yanında basıp töşkän fotosın urtaqlaştı.